Foto: mazhilis_kz
«Prezıdent Qasym-Jomart Toqaev Úkimetke elimizdiń turǵyndaryn turaqty jylýmen qamtamasyz etý boıynsha naqty tapsyrmalar júktedi. Degenmen alǵashqy aıazdyń ózine elimizdiń kommýnaldyq ınfraqurylymynyń syr bere bastaýy dástúrge aınalyp otyr. Respýblıka boıynsha tozyǵy jetken jylý ortalyqtary men ınfraqurylym 80 paıyzdan asyp ketti. Al olardyń kóbin biz 50 jyldan astam ýaqyt paıdalanyp kelemiz. Bul qaýipti jaǵdaı. Byltyrǵy Ekibastuz, Rıdder, Balqash, Kókshetaý, Qaraǵandy, Temirtaý, Petropavl qalalaryndaǵy apattar qordalanǵan máselelerdiń aıqyn kórinisi. Bul tizimge búgin Saran qalasy qosyldy. Osy qaladan azamattar tańerteń habarlasyp barlyq úılerde temperatýranyń kúrt tómendegenin aıtty. Tehnogendik qaýip-qaterdiń geografııasy geometrııalyq progressımen ósip barady. Soǵan qaramastan biz jylyna bul salany 5-7%-ǵa ǵana jańartyp otyrmyz. Bul tipti eldegi eskirý úrdisiniń ornyn toltyrmaıdy. Osylaı jalǵasa berse, jylý energııasynda kollaps ornaýy yqtımal.
E.Saırov shirigen trýba, eskirgen qazandyq keńestik zamannan qalǵan nasosty aýystyratyn ýaqyt kelgeni bylaı tursyn, ótip ketkenin aıtty. Depýtat byltyr jylý salasyndaǵy ınfraqurylymnyń tozýyn azaıtý maqsatynda 160 mıllıard teńge qarjy bólinse de, syqyrlaǵan aıazǵa tótep bere almaı otyrǵanymyzdy synǵa aldy.
Osy jyldyń basynda Parlamentte joǵary aýdıtorlyq palatanyń jylýmen jabdyqtaý salasy boıynsha qorytyndy esebinde 100-den asa naqty usynystar men júıeli syndar aıtylǵanyn jetkizdi. Al Úkimetten sol usynysqa lám degen jaýaptyń kelmegenin, jumys ta atqarylmaǵanyn eskertken depýtat bul salada menedjmenttiń jetkiliksiz ekenin aıtty.
Qys aılarynda jylýǵa jaýapty mınıstrlik jyly kabınetinen shyǵyp, jınalystardy qysqartyp, aıazdyń qandaı ekenin seziný úshin jylý qazandyqtarynyń basy-qasynda bolýy kerek dedi.
