Mektepte – ulttyq taǵam

– Árbir bilim oshaǵy «salamatty ómir saltyn ustanatyn mektepke» aınalýǵa tıis. Mek­tep­tiń kez kelgen qyzmeti sa­ýyq­tyrý-pedagogıkalyq ba­ǵyt­ta bolady. «Ulttyq mektep as­ha­nasy» jobasy ulttyq taǵam mádenıetin qalyptastyrýǵa jáne mekteptiń as mázirine 50 ulttyq taǵamdy engizýge múm­kindik beredi. Bul kóp­ǵa­syrlyq dástúr boıynsha ja­sal­ǵan mázir, ejelden kele jat­qan tájirıbeniń nátıjesi, – dedi Bishkekte «Mekteptegi ta­maqtaný – jalpy damýdyń ba­ǵyty» taqyrybynda ótken birinshi halyqaralyq forýmǵa qatysqan Oqý-aǵartý birinshi vıse-mınıstri Natalıa Jumadildaeva.

Bıyl qyrkúıek aıynan beri 1,6 mıllıonnan astam bala tegin ystyq tamaqpen qamtylǵan edi. Onyń ishinde 1,4 mıllıon bala  – 1-4-synyp oqýshylary jáne 200 myńnan astamy – áleýmettik osal top sanatyndaǵy 5-11-synyp oqýshylary. Taǵamnyń sapaly bolýyn qadaǵalaǵan mınıstrlik bilim berý uıym­da­ryndaǵy balalardyń tamaq­taný normalaryn qaıta qara­dy. Dálirek aıtsaq, as máziri­ne óńirlerde óndirilgen otan­dyq ónimderdi engizý normasy qosyldy. Brakerajdy komıs­sııalardyń jáne vedom­stvo­ara­lyq sarapshylyq toptardyń múshelerine arnalǵan monı­to­rıng­tik toptar qyzmetiniń tártibi týraly zańnamalyq normalar bekitildi.

Tek taǵamnyń sapasy emes, tamaqtaný mádenıetin qalyp­tas­tyrýǵa da erekshe kóńil bólinip otyr. Mysaly, sanı­tar­lyq tazalyq pen gıgıenany saqtaý, durys tamaq­ta­nýdy nasıhattaýǵa kóńil bólinip júr. Bilim berý uıymyna jetken bar­lyq ónimniń sanıtarlyq dári­ger­ler­den qorytyndysy bolýy shart. Al tamaqty brakerajdy komıssııalar baqylaıdy. Olar­dyń qatarynda ata-analar, qamqorshylyq keńes músheleri, sonymen qatar mektep ákimshiligi men medısına qyzmetkerleri bar.