Mınıstrdiń málimetinshe, elimizde 7,6 mln adam sportpen júıeli túrde shuǵyldanady, bul halqymyzdyń 38,5 paıyzyn quraıdy. Deneshynyqtyrý men sportty damytýdyń tujyrymdamasyn iske asyrý jospary boıynsha 2029 jylǵa qaraı el turǵyndarynyń jartysyn qamtý josparlanǵan. Máselen, Memleket basshysynyń tapsyrmasyna sáıkes óskeleń urpaqtyń sporttyq áleýetin damytýǵa basymdyq berilip otyr. Osyǵan baılanysty bıyl 250 myńnan asa bala men jasóspirimdi qamtý úshin jergilikti atqarýshy organdar 43,2 mlrd teńge bólgen. Nátıjesinde 220 myń balaǵa arnalǵan vaýcherler iske qosyldy. Bul – 6 myńnan asa sport seksııacyna tegin qatysýǵa múmkindik beredi degen sóz.
Mınıstr sportty odan ári damytý úshin jańa strategııalyq reformalar engizilgenin jetkizdi. Máselen, qazir bas jattyqtyrýshylardy konkýrstyq negizde taǵaıyndaý, sondaı-aq olardyń ókilettikterin keńeıtý arqyly memlekettik jattyqtyrýshylardyń mártebesin arttyrý máselesi talqylanyp jatyr. Sonymen qatar halyqaralyq sport uıymdarynda otandyq mamandardyń ókildigi jáne álemdik deńgeıdegi tóreshilerdi daıarlaý boıynsha jumys kúsheıtiledi. Kásibı sport klýbtaryn ustaýǵa arnalǵan lımıt jáne sportpen shuǵyldaný úshin eń tómengi jas bekitiledi.
«Qazir elimizde sporttyń 180 túri damyp keledi, olardyń tek 59-y Halyqaralyq Olımpıada komıteti tarapynan moıyndalǵan. Halyqaralyq tájirıbe negizinde «tirek» sporty túrleriniń tizimin qaıta qaraý qajettigi týyndady. Atalǵan tizimdi aıqyndaý kezinde ulttyq sport túrlerine nuqsan kelmeıdi», dedi E.Marjyqpaev.
Sonymen qatar sala basshysy modýldik úlgidegi tez salynatyn az shyǵyndy 100 sport nysan salynatynyn aıtty.
«Elimizdiń barlyq sporttyq ınfraqurylymyna aýqymdy túgendeý júrgizildi. Onyń qorytyndysy boıynsha óńirlerde jumys istep turǵan nysandardyń orta eseppen 20%-y talapqa saı emes ekeni anyqtaldy. Osylaısha, sport ınfraqurylymyna, atap aıtqanda, aýyldy eldi mekenderde asa muqtaj óńirlerdiń tizbesi aıqyndalady. Kelesi jyldan bastap «Modýldik úlgidegi tez salynatyn az shyǵyndy 100 sport nysan» jobasy iske qosý josparlanyp otyr. Aldaǵy eki jylda 113 jańa sport nysany salyný kerek. Memleket-jekemenshik áriptestigi tetigin qoldana otyryp qoldanystaǵy 26 nysan qaıta jańartylady. Almaty oblysynda olımpıadalyq daıyndyq bazasynyń qurylysy aıaqtalyp keledi. Baza bir ýaqytta 2 300 sportshyǵa 23 olımpıadalyq sport túrimen aınalysýǵa múmkindik beredi. Bul nysan jyl boıy jumys isteıdi. Ulttyq quramalar men oblystyq komandalar mańyzdy jarystar aldynda tolyqqandy oqý-jattyǵý jıyndaryn ótkize alady. Astanada Ulttyq sport ýnıversıteti salynyp jatyr. Nysandy 2025 jyly qoldanysqa berý josparlanǵan», dedi mınıstr.
Týrızm salasynda da oń ózgerister mol. Máselen, bıylǵy 9 aıdyń qorytyndysy boıynsha ishki týrıster sany 5,4 mln bolǵan, bul byltyrmen salystyrǵanda 552 myńǵa kóp. Sheteldik týrıster sany 225 myńǵa artyp, 835 myń adamǵa jetken.
Mınıstrliktiń málimetinshe, byltyr 40 mlrd teńge qarajatqa 138 ınvestısııalyq joba iske asyrylǵan. Bıyl 288 mlrd-qa 115 ınvestısııalyq joba júzege asyrylyp jatyr. Joba aıasynda 1,5 myńnan asa adam turaqty jumyspen qamtylypty. Jalpy 2019 jyldan bastap týrızm salasy Top-10 basym týrıstik aýmaqty damytý boıynsha belsendi jumys júrgizýdi qolǵa alǵan. Keıingi jyldary ishki demalysqa suranystyń artýy baıqalady.
«Týrızm salasyndaǵy 2024 jyldyń eń basty oqıǵalarynyń biri – Qytaıdaǵy Qazaqstan týrızmi jyly bolmaq. Is-sharanyń negizgi maqsaty – elimizdiń týrıstik áleýetin ilgeriletý, mádenı tájirıbe almasý, eki el arasyndaǵy ózara túsinistik pen dostyqty nyǵaıtý. Qytaıdaǵy týrızm jyly aıasynda Beıjiń qalasynda ashylý rásimi, týrızm túrleri (ekologııalyq, medısınalyq, agrotýrızm, qalalyq, MICE jáne ǵaryshtyq týrızm) boıynsha taqyryptyq aptalar ótkizý, Qytaıdyń 7 iri qalasynda TOP-20 otandyq destınasııalardyń tusaýkeserin ótkizý josparlanyp otyr», dedi E.Marjyqpaev.
Qazir elimizde pandemııadan keıin 80 baǵyt boıynsha halyqaralyq áýe qatynasy qalpyna keltirilgen. 74 elge vızasyz rejim jańartyldy. Bul tizimdi 100-ge deıin arttyrý josparlanyp otyr. Sondaı-aq oıyn bıznesiniń josyqsyz sýbektilerimen belsendi kúres júrgizip jatyr. Máselen, 2023 jyly sotqa 14 talap-aryz jiberilgen, nátıjesinde 7 býkmekerlik keńse, 5 totalızator jáne 1 oıyn avtomattary zaly jumysyn toqtatqan. Depýtattyq korpýspen birlesip azamattardy lýdomanııadan jas shekteýin 25 jasqa deıin kóterý, býkmeker keńseleri, bás tigý týraly kez kelgen jarnamaǵa barlyq jerde tyıym salý máselesi qarastyrylyp jatqany aıtyldy.
