Baýyrjan Jaqyptyń esimi óleń ólkesinde ózine tán órnegi bar aqyn, ǵylym jolynda irgeli izdenisterge barǵan ǵalym, jýrnalısterdiń birneshe býynyn tárbıelegen ulaǵatty ustaz retinde kópshilikke jaqsy tanys. Asqaraly alpys jasqa úlken shyǵarmashylyq tabyspen jetken onyń otty jyry oqyrmannyń syrlasyna aınalǵanyn mazmundy is-sharaǵa jınalǵan zııaly qaýym tebirene jetkizdi.
Kesh shymyldyǵy Memleket basshysy Qasym-Jomart Toqaevtyń quttyqtaý hatymen ashylyp, Prezıdenttiń izgi lebizin rýhanı is-sharany tizgindegen Mamaı Ahetov oqyp berdi. Onda «Oqyrman qaýym ózińizdi qazaq poezııasyn damytýǵa eleýli úles qosqan kórnekti aqyn, qarymdy qalamger retinde qurmetteıdi. Siz uzaq jyl boıy Ál-Farabı atyndaǵy qazaq ulttyq ýnıversıtetinde eńbek etip, kóptegen shákirt tárbıeledińiz. «Qazaq ensıklopedııasyn» basqaryp, tól shejiremizdi tańbalaý isine zor eńbek sińirdińiz. Sizdiń kórkemdik qýaty mol shyǵarmalaryńyz jurtshylyqtyń júregine jol taýyp, laıyqty baǵasyn aldy. Týyndylaryńyz ózge tilderge aýdarylyp, qazaq ádebıetin dáripteýge úles qosyp kelesiz. Tól mádenıetimizdi órkendetý jolyndaǵy eseli eńbegińiz úshin shynaıy rızashylyǵymdy bildiremin. Aldaǵy ýaqytta da oqyrmandaryńyzdy jaýhar jyrlaryńyzben qýanta beresiz dep senemin», delingen hatta.
Kesh qonaqtary shyǵarmashylyq galereıasy názik sezimdermen ıirim tapqan Baýyrjan aqynnyń lırıkalyq oramdaryna tebirene tolqyp, shaıyrdyń sózine jazylǵan sulý sazdarmen birge terbeldi. Týǵan ólke muńyn sýrettegen «Jan daýasy» poemasy negizinde ázirlengen qoıylym Semeı polıgonynyń qazaq balasy men qazaq dalasyna tıgizgen qasiretin sherlene jetkizdi. Al aqynnyń «Dombyra» jáne «Urshyq» óleńderine qurylǵan lırıkalyq kompozısııa ulttyq qundylyqtarymyzdyń kıe-qutyn kóńilge quıyp berdi.
Qalamdas inileriniń ádebıet pen pýblısıstıkadaǵy aıbyndy adymy týraly aqtaryla aıtqan Memlekettik syılyqtyń ıegerleri Temirhan Medetbek pen Iranbek Orazbaev jyrdan shashý shashsa, Ulyqbek Esdáýlet TÚRKSOI halyqaralyq uıymynyń bas hatshysy Sultan Raevtyń kesh ıesine joldaǵan quttyqtaý hatyn jetkizdi. Hanbıbi Esenqara, Qatıra Jalenova, Abzal Bóken, Bolat Sharaqymbaı, Naǵashybek Qapalbekuly qatarly aqyn-jazýshylar kesh ıesiniń shyǵarmashylyǵy haqynda jaqsy sóz aıtyp, azamattyq kelbetin jyrmen kesteledi.
– Baýyrjan qazaq ádebıetine erte bastan etene aralasqan, talantymen jastaı tanylǵan daryndy aqyndardyń sanatynda. Sonaý 80-jyldarda jaryq kórip, jurtty eleń etkizgen «Urshyq» degen tyrnaqaldy óleńinen bastap, ulttyq rýhqa sýarylǵan kesek-kesek jyrlary Abaı, Shákárim, Muhtar, Tóleýjandaı ulylar men klassıkter týǵan topyraqtan poezııaǵa mańdaıy jarqyraǵan urpaq kelgenin aıǵaqtady. Baýyrjan aqyn únemi jyrdan-jyrǵa, kitaptan-kitapqa ósýmen bolǵanyn baǵamdaımyz, – deıdi Ulyqbek Esdáýlet.
Rýhanı keshte Shámil Ábiltaı, Baıan Saǵymbaeva, Sáýle Janpeıisova, Qadyrǵalı Kóbentaı, Ádilet Musa, «Seriler» toby, Gúlmıra Sarına syndy óner sańlaqtary aqyn shyǵarmashylyǵynan syr shertti. Almaty qalasy ákimdiginiń uıytqy bolýymen ótken keshte Baýyrjan Jaqypqa Halyqaralyq «Jambyl qorynyń» altyn medali tabystaldy.
ALMATY
