Qazaq elinde ómir súretin árbir etnos ókili baqytty, solardyń biri – menmin. О́zim osy elde týyp-ósip, ómir súrip jatqanyma rızamyn. Meniń dostarymnyń kópshiligi – qazaq qyzdary men uldary. Qazaq halqy – danyshpan, meıirimdi, mádenıetti, bilimdi, eńbeksúıgish, dostyqtyń qadirin biletin, qolyndaǵy baryn teń bólisetin jomart el. Sol sebepti Eskendir Hasanǵalıevtiń «Atameken» ánindegi:
«Mańdaıymnan sıpap ótken samaldy,
Qazaǵymnyń alaqany dep bilem...
Kúnniń nuryn, aıdyń appaq sáýlesin,
Qazaǵymnyń mahabbaty dep bilem!» ,
degen sózderdi qazaq elinde ómir súrip jatqan basqa etnos ókilderiniń sezimindeı kóremin. Bul ándi jaqsy kórip aıtyp júremin.
Men Panfılov aýdany Jarkent qalasynda turamyn. Mamandyǵym – muǵalim. Jeti qyzy bar otbasynyń kenjesimin. Ákem Qazan tóńkerisinen keıin keńes ókimetine jan-tánimen qyzmet etken kedeı sharýa balasy edi. 1938 jyly 2 jas kezimde «halyq jaýy» dep qamalǵan. Ákem ustalǵannan keıin «halyq jaýynyń» áıeli men bala-shaǵasy degen zorlyq-zombylyqqa shydaǵan anam marqum bizdi ósirip, tárbıe bergen. Ákem túrmede bolǵan kezinde Ekinshi dúnıejúzilik soǵys bastalyp, ol maıdanǵa alynady. Soǵysta qaza tapqannan keıin ǵana Qyzyl Armııa sarbazynyń bala-shaǵasy retinde baǵalandyq.
Soǵys zardabynan aýyldaǵy bastaýysh synyptar jabylyp, mektepke 9 jastan asqanda bardym. Oǵan deıin anammen birge eńbek ettim. Ápkelerim qıynshylyq jaǵdaıda 7 jyldyq mektepten soń oqýyn ári qaraı jalǵastyra almady. Otbasymda jalǵyz men ǵana joǵary bilim aldym. 7 jyldyq mektepti Penjim aýlynda bitirip, 1953 jyly Panfılov pedagogıkalyq ýchılıshesine oqýǵa tústim. 1957 jyly ony aıaqtap, Almatydaǵy Abaı atyndaǵy pedagogıkalyq ınstıtýttyń til ádebıet, tarıh fakýltetinde oqyp, 1962 jyly dıplom alyp shyqtym.
Eńbek jolymdy óz aýylymda 8 jyldyq mektepten bastadym. Atalarymyz «Qıynshylyq kórmegen adam ómirdiń qadirin bilmeıdi» dep aıtqandaı, ash-jalańash júrip, qysta tońyp, kaladan aýylǵa jaıaý baryp kelip, qıynshylyqta bilim alǵandyqtan, oqyǵan-toqyǵanymdy jas urpaqqa sapaly bilim, sanaly tárbıe berýge jumsadym. Sondyqtan eńbek jolymda 5 jyl qarapaıym muǵalim, 7 jyl mektep dırektorynyń orynbasary, 20 jyl aýdandyq bilim bóliminde ádisker bolyp, birneshe jyl ádisker bólimin basqardym. Eńbegim laıyqty baǵalanyp, kóptegen marapatqa ıe boldym.
Birneshe ret aýyldyq keńeske depýtat bolyp saılandym. Muǵalimder sezine, respýblıkalyq konferensııalarǵa delegat boldym. Qazaqstan halyq aǵartý isiniń ozat qyzmetkeri atandym. Búginde de qoǵamdyq jumystarǵa aralasyp turamyn. Kópjyldyq eńbegimdi baǵalap, «Panfılov aýdanynyń qurmetti azamaty» ataǵyn bergeni úshin aýdan ákimi Marat Saǵymbekulyna, Jetisý uıǵyr etno-mádenıet ortalyǵynyń basshysy Turǵanjan Zordynulyna, taǵy basqalarǵa rızalyǵymdy bildiremin.
Bizdiń aýdan – eń baı aýdan. Sebebi halqymyz mádenıetti, bilimdi, eńbekqor, dostyǵy men birligi jarasqan. Dostyq pen birlik bar jerde tirshilik bar, tirshilik bar jerde bereke bar, bereke bar jerde baılyq bar degen sózdiń shynaıylyǵyn dáleldegen aýdanbyz. Halyqtyń barlyǵy eńbekpen qamtylǵan. Bunyń bári aýdan halqy men basshylarynyń is-áreketi bir maqsatta durys baǵytta ekenin kórsetedi.
Árbir aýyl men qalada kókiregine túıgen jaqsylyqtaryn nasıhattaıtyn ardagerler bar. Men de solardyń birimin. El halqyna, ásirese jastarǵa tileıtinim: azat Otanymyzdyń qadirin bileıik. Birligimizdi saqtaıyq. Yntymaqty, ózara senimdi buzatyn arandatýshylyqqa tosqaýyl qoıaıyq. Urpaq tárbıesinde ata-ana, muǵalim jáne qoǵamnyń tilegi birdeı bolsyn.
Maımınıam IMIаROVA,
eńbek ardageri
Jetisý oblysy,
Panfılov aýdany
