О́ner ıesiniń jary Arman Dúısenovtiń áleýmettik jelidegi paraqshasyn qaıta jalǵastyratynyn aıtqan.
Kompozıtor dúnıeden ótkennen keıin onyń jelidegi paraqshasy da bir jyldan astam ýaqyttan beri ózgerissiz qalǵan edi. Al marqumnyń paraqshasyna 595 myń adam jazylǵan.
«Ardaqty aǵaıyn! Bizdiń áýletimizdiń ǵana emes, tutas eldiń súıikti perzentine aınalǵan Arman Dúısenovteı azamattyń dúnıeden kóshkenine jylǵa tolýǵa aınaldy. Osy bir jyldyń bizdiń otbasymyz úshin qanshalyqty muńly, qanshalyqty aýyr bolǵanyn aıtyp jetkizý qıyn. Ákesin izdegen ul-qyzyńnyń jáýdiregen janaryna sharasyz kúıde qaraýdan aýyr ne bar? Osy qaıǵyny jan júregimen sezinip, bizdiń qaıǵymyzdy bólisken qalyń jurtqa Alla razy bolsyn!
Mundaı synaqty endi eshkimniń basyna bermesin. Armannyń asyl beınesi, ańqyldaǵan aq júregi, ásem ánderi talaıdyń janyn baýraǵany sózsiz, ony eldiń izdeıtini de sodan bolsa kerek. Onyń áleýmettik jelidegi paraqshasyn óshirmeýimizdi, qaıta ony turaqty júrgizýimizdi ótinip suraýshylardyń da qarasy qalyń. Armannyń ekinshi ómiri jalǵasqanyn, onyń elimen birge jasaǵanyn biz de qalaımyz. Sondyqtan Armannyń áleýmettik paraqshasyn qaıta jańǵyrtýdy jón sanadyq.
Munda Armannyń ánderi, kompozısııalyq shyǵarmalary, jasaǵan baǵdarlamalary jarııalanady. Bul jumystarǵa sizderdiń de kómekterińiz tıerine senemiz. Osylaısha Armannyń asyl beınesi bárimizben birge jasaıtyn bolady. Barshańyzdyń otbasylaryńyzǵa amandyq, baq-bereke tileımin», delingen jazbada.
Jeli qoldanýshylary kompozıtordyń ómirden ótkenine jyl tolýyna oraı eske alyp, estelikteri men tilekterin bildirdi.
