Aıta ketsek, qoıylymnyń qoıýshy-rejısseri Qazaqstannyń eńbek sińirgen qaıratkeri, «Qurmet» ordeniniń ıegeri Ashat Maemırov, keıipkerler men oryndaýshylar teatr ártisteri.
Is-sharany qala ákimi Jeńis Qasymbektiń quttyqtaýymen orynbasary Eset Baıken ashty.
«Qýanysh Májikenulynyń qazaq mádenıeti men ónerine qosyp jatqan úlesin bir qoıylymǵa syıǵyzý múmkin emes, degenmen osydan eki aı buryn jaqsy bir qoıylym jasaýdy aqyldastyq. Qoıylym teatr sahnasynan oıyp turyp óziniń ornyn alatynyna hám kórermenniń kóńilinen shyǵatynyna senimdimin», dedi Eset Berikuly.
Munan soń, poetıkalyq-mýzykalyq qoıylym bastalyp, kórermender poezııa men mýzyka álemine saıahattady. «Máńgilik muńnyń áýeni» premerasynda jas akterlardyń biri aqyn, biri sazger, endi biri bard, taǵy biri avtor rólderin somdap hám Qýanysh Maqsutovtyń shyǵarmalaryn qoıylymnyń óń boıynda sheberlikpen oryndap, kórermenderdiń ystyq yqylastaryna bólendi. Kórermen qaýym birtýar tulǵany qoıylymda ár qyrynan kórip, estetıkalyq túrli áserler aldy.
Qoıylym sońynda mereıtoı ıesine qala ákiminiń yqylas gúli tartý etildi.
Mádenıet jáne aqparat mınıstrliginiń mádenıet komıtetiniń tóraǵasy Kúmis Seıitova sala mınıstri Aıda Balaevanyń quttyqtaýyn oqyp berdi jáne mereıtoı ıesine «Mádenıet salasynyń úzdigi» tósbelgisin tabystady.
Mereıtoı ıesi sóz alyp, mınıstrlik pen qala ákimdigine, qoıylymnyń qoıýshy-rejısseri men teatr ónerpazdaryna jáne kórermen qaýymǵa alǵysyn aıtyp, birneshe qonaqqa kitabyn tartý etti.
Sol kúni Ulttyq akademııalyq kitaphanada Qýanysh Maqsutovtyń «Qut» kitabynyń tanystyrylymy ótken bolatyn.
