Foto: ashyq derekkóz
«Qabyldanǵan normalar kámeletke tolmaǵan balalarǵa beriletin pasporttar úshin memlekettik baj salyǵyn 8 AEK-ten 4 AEK-ke deıin tómendetýdi, pasportty berý úshin onyń betteriniń sanyna qaraı, ıaǵnı memlekettik baj stavkalaryn engizýdi kózdeıdi. 16 jasqa deıingi balalarǵa – 4 AEK, 36 betten turatyn tólqujattar – 8 AEK, 48 bettik tólqujattar – 12 AEK bolady», dep habarlady IIM baspasóz qyzmeti.
Sondaı-aq qujat bastapqy joǵalǵan kúnnen bastap bir jyl ishinde joǵalǵan qujatty qalpyna keltirýge eki jáne odan da kóp ret júgingen kezde jeke kýálikterdi bergeni úshin memlekettik baj salyǵy 0,2 AEK-ten 1 AEK-ke deıin ulǵaıtylady.
Burynǵydaı jeke kýálikterdi birinshi ret alǵan kezde quny 0,2 AEK quraıdy. Qabyldanǵan normalar 2024 jyldyń 1 qańtarynan bastap kúshine enedi.
Eske salaıyq, 2020 jyldan bastap on alty jasqa deıingi balalardyń fotosýretterin Qazaqstan Respýblıkasynan tys jerlerge shyǵý kezinde ata-analarynyń pasporttaryna jazý jáne japsyrý alynyp tastaldy. Osyǵan baılanysty balalarǵa shetelge shyǵý kezinde jeke pasportty resimdeý talap etiledi.
«Jeke basty kýálandyratyn qujattar týraly» zańǵa sáıkes Qazaqstan Respýblıkasy azamatynyń pasporty 10 jyl qoldanylý merzimine beriledi.
Balalarǵa arnalǵan tólqujattar halyqaralyq tájirıbeni jáne balalardyń tez ózgeretin kelbetin eskere otyryp, 12 jasqa deıingi balalarǵa arnalǵan tólqujattyń jaramdylyq merzimi − 5 jylǵa deıin. 12 jastan asqandarǵa 16 jasqa deıin beriledi. Odan ári tólqujat pen jeke kýáliktiń jaramdylyǵy ádettegideı 10 jyl bolyp qala beredi.
