Úkimet basshysy Qatar Qazaqstannyń arab álemindegi mańyzdy saıası jáne ekonomıkalyq seriktesi ekenin atap ótti. 30 jyl buryn dıplomatııalyq baılanys ornatylǵan. Al keıingi jyldary ekijaqty qarym-qatynastar ornyqty damyp keledi, oǵan eki el basshylarynyń belsendi baılanystary yqpal etti.
Álıhan Smaıylov qazan aıynda Dohada ótken joǵary deńgeıdegi Qazaqstan-Qatar birlesken komıssııasynyń 6-otyrysynyń tabysty bolǵanyn atap ótti. Sonymen qatar otyrys aıasynda eki eldiń 150-den astam kásipkeriniń qatysýymen bıznes forým uıymdastyryldy.
«Atalǵan is-sharalar bizdiń saýda-ekonomıkalyq baılanystarymyzdyń keńeıýine aıtarlyqtaı serpin beredi. Aıta ketý kerek, byltyr bizdiń ekonomıkaǵa tartylǵan Qatar ınvestısııasynyń kólemi úsh ese ósti. Sondaı-aq 10 aıda taýar aınalymynyń kólemi shamamen úsh esege ósti. Dese de, saýda jáne ınvestısııalyq áriptestikti arttyrýǵa áli de áleýet bar ekeni anyq. Biz qolda bar múmkindikterdi keńeıtýge múddelimiz. Qazirgi tańda agroónerkásiptik keshende birqatar jobany birlesip júzege asyrý perspektıvalary bar ekenin erekshe yqylaspen atap ótkim keledi», dedi Premer-mınıstr.
Áńgime Aqmola oblysynda bıdaı óńdeý zaýytynyń qurylysy týraly bolyp otyr. Joba quny shamamen – 200 mln dollar. Qazirgi ýaqytta onyń tujyrymdamasy men seriktestik sharttary pysyqtalyp jatyr.
«Qazaqstanda bıznesti damytýǵa qolaıly barlyq jaǵdaı bar. Biz óz tarapymyzdan qajetti qoldaý kórsetýge daıynbyz», dedi Álıhan Smaıylov.
Abdýlazız ben Sultan Ál-Rýmeıhı myrza Úkimet pen el basshylyǵynyń jyly qabyldaýy men qoldaýy úshin rızashylyǵyn bildirdi. Elshi Qatardyń ekijaqty qarym-qatynastardy damytýǵa, bıznes jobalardy júzege asyrýǵa jáne ınvestısııalyq áriptestikti nyǵaıtýǵa úlken qyzyǵýshylyq tanytyp otyrǵanyn atap ótti.
