Aıta keteıik, aýyl sharýashylyǵy men sıfrlyq damý, ınnovasııalar jáne aeroǵarysh ónerkásibi mınıstrlikteri aýyldyq okrýgterge aýqymdy skrınıng júrgizgen bolatyn. Skrınıng nátıjeleri boıynsha ár eldi mekenniń baǵyty anyqtalyp, sıfrlyq platforma ázirlendi.
«Qarajatty bólý kezinde ár aýdannyń ereksheligin eskergen jón. Bizdiń basty maqsatymyz – azamattarǵa óz kásibin ashýǵa múmkindik berý nemese jańa jumys oryndaryn qurý arqyly aýyl turǵyndarynyń tabysyn arttyrý. Sondyqtan ákimdikter osyǵan basa mán berýi kerek», dedi Tamara Dúısenova.
Aqtóbe oblysy ákiminiń orynbasary Mavr Abdýllın óńirde júrgizilgen jumys nátıjeleri týraly aıtyp berdi. Onyń aıtýynsha, oblystaǵy ózekti máselelerdiń biri – ımportqa táýeldilik. Sondyqtan ári qaraı birqatar baǵyt boıynsha ónim óndirý qolǵa alynbaq. Máselen, mal sharýashylyǵy boıynsha 2,5 myńnan asa, ósimdik sharýashylyǵy boıynsha 264, qus sharýashylyǵy boıynsha 285 joba usynylyp otyr.
Oblys ákiminiń orynbasary uıymdasqan sharýashylyqtardan úı janýarlaryn satyp alýdy erejege engizýdi usyndy, bul rette olar satý operatorlary retinde belgilenbek. Osylaısha, baǵdarlamaǵa qatysýshylar arasynda maldy alyp-satý faktileriniń aldy alynbaq. Sondaı-aq óńir jeke qosalqy sharýashylyqtardy jumys istep turǵan iri fermerlik sharýashylyqtar men qaıta óńdeý kásiporyndary aınalasynda shoǵyrlandyrýǵa basa mán bermekshi.
Aıta keteıik, turǵyndardyń tabysyn arttyrý baǵdarlamasy óńirde jumyssyzdar sanyn 1 210-ǵa, al ataýly áleýmettik kómek alýshylar qataryn 157 adamǵa qysqartýǵa jol ashty.
Batys Qazaqstan oblysy da óz turǵyndaryn azyq-túlik ónimderimen qamtamasyz etýge nıetti. О́ńir basshysynyń orynbasary Qalııar Aıtmuhambetovtiń sózinshe, qazirde óńir ózin áleýmettik mańyzy bar azyq-túlik taýarlarynyń segiz túrimen tolyq qamtyp otyr. Endi «Aýyl amanaty» baǵdarlamasynyń kómegimen azyq-túliktiń taǵy jeti túri boıynsha kórsetkishterdi jaqsarýdy kózdep otyr.
Joba aıasynda bastapqyda qarjy kóbine shıkizat bazasyn qurýǵa baǵyttalmaq bolǵan, endi aımaq qaıta óńdeýge basymdyq bermek. Keler jylǵa oblys somasy 8 mlrd teńge bolatyn 1 345 joba josparlap otyr. Onyń basym bóligin mal men qus sharýashylyǵyna baǵyttaý kózdelip otyr.
«Aýyl amanaty» jobasy boıynsha alynǵan ár malǵa chıp ornatylýy kerek. Osylaısha, qarajatty maqsatyna saı paıdalaný jaǵy baqylaýda bolmaq. Eldi mekender arasyndaǵy qashyqtyqty eskere otyryp, aýyldyq okrýgterde aýyl sharýashylyǵy kooperatıvterin qurý aýyl sharýashylyǵy jerleriniń áleýetin tıimdi paıdalanýǵa kómektesedi.
Túrkistan oblysynyń jospary sál ózgeshe. Bıyl «Aýyl amanaty» jobasyna 64 aýyldyq okrýg qatysqan. Aralyq nátıjelerge sáıkes 3,5 myńnan asa jumys orny qurylyp, ataýly áleýmettik kómek alýshylar sanatynan 340 adam shyqty. Aýyl sharýashylyǵy ónimderin óńdeıtin 19 jańa nysan ashylyp, 328 jylyjaı qurylysy qarjylandyryldy. Azamattardyń óz kásibin ashýyna 120-dan asa joba maquldandy.
Túrkistan oblysy ákiminiń orynbasary Ermek Kenjehanulynyń sózinshe, kelesi kezeńde basqa eldi mekenderdi qarastyrý kózdelgen. Shıkizatty qaıta óńdeıtin zákirlik jobalardy qurýǵa basa nazar aýdarylatyn bolady.
Sonymen qatar keńes barysynda nesıege kepildik berý, óńirlerdegi ınfraqurylymdy jaqsartý máseleleri qozǵaldy. Olardyń barlyǵyn múddeli memlekettik organdar qaraıtyn bolady.
