Ushaqty jetkizýdi Qytaı Halyq Respýblıkasynyń Qazaqstan Respýblıkasyndaǵy elshiligi janyndaǵy áskerı attashe apparaty jáne Qytaıdyń avıasııa ónerkásibi korporasııasynyń «CATIC» kompanııasy júzege asyrdy.
Aıta keteıik, «CATIC» kompanııasy 1979 jyldan qazirgi ýaqytqa deıin álemniń 60-tan astam eline qarý-jaraq pen áskerı tehnıkanyń 2600-den astam túrin, onyń ishinde áýe kemeleriniń 35 túrin jetkizdi.
Qazaqstan Respýblıkasynyń Ulttyq ulany men Qytaı avıasııa ónerkásibi arasyndaǵy yntymaqtastyq 2016 jyldary bastalǵan bolatyn. Nátıjesinde elimizdiń quqyqtyq tártip áskerlerine 2018 jyly alǵashqy Y8F200W ushaǵy jetkizildi. Ulttyq ulannyń aldyna qoıylǵan barlyq qyzmettik-jaýyngerlik mindetterdi oryndaý barysynda bul ushaq Qazaqstannyń ártúrli klımattyq jaǵdaılarynda paıdalanýǵa qabiletti.
Y8F200WA ushaǵy (keńestik An-12 kólik ushaǵynyń eń jaqsy analogy) - bul maksımaldy qashyqtyǵy 4100 km bolatyn tolyq qysymdy, kóp maqsatty ortasha kólik ushaǵy jáne salmaǵy 20 tonnaǵa deıingi iri júkterdi de, 86 áskerı qyzmetshige deıingi qyzmettik jolaýshylardy da tasymaldaýǵa arnalǵan. Ushaqtyń krýızdik jyldamdyǵy 550 km/saǵ, sondaı-aq tájirıbelik jaǵdaıda 10050 m bıiktikte usha alatyny belgili.
Ushaqta kúndiz-túni qolaısyz aýa raıynda jumys isteýge qajetti jabdyqtar bar, sonymen qatar jabdyqtalmaǵan jáne dalalyq aerodromdarǵa qona alady.
Birinshi ushaqty paıdalaný Ulttyq ulanǵa eldiń qoǵamdyq qaýipsizdigin qorǵaý jáne shet elderge kómek kórsetý jónindegi mindetterdi sheshýde avıasııany qoldanýdyń múmkindigin birneshe esege ulǵaıtty.
Tek 2023 jyly Sırııa Arab Respýblıkasyna, Túrkııa Respýblıkasyna jáne Aýǵanstan Islam Ámirligine tótenshe jaǵdaılar kezinde gýmanıtarlyq kómek kórsetý kezinde 120 tonnadan astam gýmanıtarlyq júk jetkizildi, 80-nen astam adam evakýasııalandy.
Barlyǵy 2025 jylǵa deıin «Bir beldeý – bir jol» jobasy sheńberinde otandyq avıasııa ónerkásibin damytý úshin úlken mańyzy bar osy úlgidegi taǵy 4 ushaqty jetkizý josparlanǵan, bul óz kezeginde Qytaı Halyq Respýblıkasy men Qazaqstan Respýblıkasy arasyndaǵy dostyq kópirdi nyǵaıtady, sondaı-aq eki el arasynda jan-jaqty strategııalyq áriptestikti damytýǵa jańa úles qosady.
– Ulttyq ulan tek Ortalyq Azııa óńirinde ǵana emes, TMD elderi arasynda da osy úlgidegi ushaqtardy satyp alýda izashar bolyp tabylady. Y8F200WA ushaǵyn tańdaý «baǵa-sapa» sııaqty krıterıılerdi sátti biriktirdi. Áýe kemesin Qytaıdan Qazaqstanǵa sátti jetkizgeni úshin komandırge jáne ekıpajdyń barlyq quramyna erekshe alǵysymdy bildirgim keledi. Ulttyq ulannyń avıasııalyq bazasynyń ushý jáne ınjenerlik-tehnıkalyq quramdaryn Qytaı Halyq Respýblıkasynyń aýmaǵynda oqytyp, daıyndaǵan zaýyt ókilderine erekshe rahmet, - dep atap ótti jumys keńesi barysynda Ulttyq ulan Bas qolbasshysynyń tehnıka jáne qarý-jaraq jónindegi orynbasary general-maıor Konstantın Voronkın.
- Búgin qazaq elindegi dostarymyzben birge osynda jınalý men úshin úlken mártebe. Qytaı men Qazaqstandy ortaq taýlar men ózender baılanystyrady. Bizder tatý kórshi, adal dos, senimdi seriktester jáne baýyrlas halyqpyz. Qazaqstan Respýblıkasynyń Ulttyq ulany men QHR-nyń Qazaqstan Respýblıkasyndaǵy elshiligi janyndaǵy áskerı attashe apparatynyń qoldaýymen ushaqty berý jáne jetkizý jospar boıynsha sátti aıaqtaldy.
Yntymaqtastyq jyldarynda biz Ulttyq ulannyń avıasııa mamandary óz isiniń kásipqoılary ekenine kóz jetkizdik. Sizdermen ózara baılanys ornatý Qytaı qyzmetkerlerine jaǵymdy áser qaldyrady. Biz aldyńǵy qabyldanǵan ushaqtyń sapaly jumys kórsetkenine óte qýanyshtymyz jáne Ulttyq ulan osy ushaqtardy tıisti túrde paıdalanady jáne qyzmet kórsetedi, al keıinnen – áýe floty joǵary dárejede jumys isteı alady degen úmittemiz. Sonymen qatar Qazaqstannyń Ulttyq qorǵanys isine eleýli úles qosýdy jalǵastyra beredi degen oıdamyz. Biz ushaq óndirýshileri retinde áýe kemesiniń osy túrin paıdalaný men qyzmet kórsetýde jan-jaqty qoldaý men tájirıbe almasýdy qamtamasyz etý úshin qoldan kelgenniń bárin jasaýǵa daıynbyz jáne qyzmet etý merzimi kezinde tehnıkalyq qoldaý kórsetemiz.
Qytaı halqynda «Dostyq – taýsylmas baılyq» degen maqal bar. Osylaısha, Qytaı men Qazaqstan yntymaqtastyq jáne seriktestik tarıhynyń kelesi taraýyn ashady, - dep atap ótti «CATIC» kompanııasynyń klıentterge qyzmet kórsetý departamenti dırektorynyń orynbasary Iаng Djıngjı.
