Is-sharaǵa 9-13 jas aralyǵyndaǵy oqýda úzdik, sportta jetistikke jetken 300-ge jýyq bala qatysty. Olardy mekteptegi qamqorshylyq keńes ata-analarymen birge tańdady. Sonymen birge kópbalaly otbasynan shyqqan, áleýmettik jaǵynan az qamtamasyz etilgen oqýshylar da jańajyldyq merekeniń qonaǵy boldy. Qala ákimi Ǵabıt Syzdyqbekov Prezıdent Qasym-Jomart Toqaevtyń atynan balalardy jańa jyl merekesimen quttyqtady.
«Jańa jyl jaǵymdy jańalyqtarǵa, jańa jeńister men tolaǵaı tabystarǵa baı jyl bolsyn! Kez kelgen jeńis pen jetistik úlken eńbekpen keledi. Ol úshin ózińdi jan-jaqty damytý kerek. Sabaqqa zeıin qoıyp, kóp kitap oqyp, sportpen aınalysyp, ónerge umtylý qajet. Uly ister men bıik belesterdi baǵyndyratyn jas urpaq – senderge senim artamyz. Ata-analaryńyzdy qurmetteńizder, únemi sender úshin qýanyp júretin bolsyn. Kishige qamqor bolyp, úlgi-ónege kórsetip júrińizder», dedi shahar basshysy.
Merekelik is-sharada balalar án shyrqap, bı bıledi. Qyzyqty sahnalyq qoıylymdar balǵyndardyń kóńil kúıin erekshe shattyqqa bóledi. Sonymen birge «Meıir» balet tobynyń jas bıshileri óz ónerlerin kórsetti. Oqýshylar saraıynyń ustazdary túrli janýardyń keıpinde balalardyń kóńilin aýlady, mektepten tys úıirme tárbıelenýshileri, Saz mektebiniń skrıpkashy shákirtteri de ónerlerin oqýshylarǵa pash etti.
Qalalyq bilim basqarmasynyń basshysy Nurgúl Shamshıevanyń aıtýynsha, jyldaǵy dástúr boıynsha ótetin Prezıdenttiń jańajyldyq shyrsha merekesinde balalar 100 myń teńgeniń sertıfıkatyna, úsh tilde jazylǵan «Atameken ańyzy» kitabyna, sondaı-aq táttileri bar syılyqtarǵa ıe boldy.
ShYMKENT
