Foto: aikyn.kz
Jýyrda Almatyda 4 birdeı balanyń ata-anasy Talap Qasymov pen jubaıy Gúljahan Yrsymbaeva kóz jumdy. Ajalǵa qalada bolǵan avtobýs apaty sebep. Qaıǵydan qan jutqan aǵaıyn-týys marqumdardy aqtyq saparǵa shyǵaryp saldy. Kóz jumǵan erli-zaıyptylardyń artynda 4 balasy qaldy, eń úlkeni – 23-te, ekinshisi – 18 jasta. Úshinshisi – 9-synyp oqýshysy, al kenjesiniń jasy nebári beste.
«Balalary túsinbeıdi áli, olar biz kelgenimizge qonaq dep, júgirip oınap júr, erten myna adamnyń bári ketkennen soń, ne dep jaýap beremiz? Mamasyn surasa, papasyn surasa ne dep aıtamyz?», deıdi marqumdardyń týysy Gúlnár Tursynbekova.
Aıta ketsek, kóz jumǵandar qazaq tili men ádebıet pániniń muǵalimderi edi. Apat bolǵan kúni olar mektepten shyǵyp úıge qaraı asyqqan. Jol jıegine turyp, qala syrtyna júretin kólikti kútken eken. Biraq oılamaǵan jerden avtobýstyń astyna túsip qaıǵyly oqıǵanyń qurbandary boldy.
«Kináliler jazasyn alsyn. Ol qylmys qoı baryp turǵan! Bir adamdy emes birneshe adamdy basyp ótken. Kelip, tipti keshirim suramaǵan adamdarǵa ne dep aıtamyz? Avtobýs parkinen de kelmedi eshkim», dep kúrsindi taǵy bir týysy Súıinbaı Ońǵarbekov.
Endi qara jamylǵan otbasy avtobýs parkinen ótemaqy tóleýdi de talap etetinin aıtty.
Eske salaıyq, ótken aptada Almatydaǵy Raıymbek dańǵylynyń boıynda jol apaty boldy. №47 baǵyttaǵy qoǵamdyq kólik joldyń jıegindegi bir top adamdy qaǵyp, úsh adam kóz jumdy, taǵy tórteýi aýrýhanaǵa túsken. Apatqa júrgizýshi men jolaýshy arasyndaǵy daý sebep bolǵan. Qazir oqıǵa qatysty tergeý júrip jatyr. Kúdikti jolaýshy eki aıǵa qamaýǵa alynǵan.
