Bıylǵy qys Ertis-Baıan óńirinde erekshe jyly. Jýyrdaǵy úskirik aıazdardyń sońy jylymyqqa ulasyp, qazirgi ýaqytta kúndizgi temperatýra +3 gradýsty kórsetip tur. Onyń ústine osy aptanyń seısenbisinde jaýǵan jańbyr ózi az ǵana túsken aq ulpany eritip jiberdi. Aýa raıynyń bulaısha qubylýy qyzyq bolǵanda Ertis ózeni jaǵalaýynda salynyp jatqan muz qalashyqtardy eritip jiberdi. Pavlodar qalasynyń bıligi Jańa jyl meıramyn ulan-asyr etip toılaýdy jón dep sheship, bıýdjetten baqandaı 185 mln teńge bólgen. Onyń 52 mln teńgesi jańadan ornatylǵan jasandy shyrshanyń qurylysyna bólinse, 53 mln teńge muzdan qalashyqtar men syrǵanaqtar, jańa jyldyq ertegilerdiń keıipkerlerin keskindeýge baǵyttalǵan.
Qazyna qarajatyn jaratýshy quzyrly mekemeler men konkýrsty utyp alǵan merdigerler aýa raıyn eskermegen be, jýyqta ǵana qalanǵan muz qalashyqtyń deni bir kúnniń ishinde eridi de ketti. Al ortalyq jaǵalaýdyń tómengi tusynda turǵyzylyp jatqan qalashyqqa qaraýdyń ózi aıanyshty edi. Ýsolka ózeniniń muzynan oıylyp alynǵan muz kesekteri jyly aýa raıyna shydas bermeı erip, aınalasy bir-eki saǵattyń ishinde kólshikke aınaldy.
Qala halqy osynshama qyrýar qarjy bólingen muz qalashyqtyń bir kúnde erip ketkenin túsine almaı dal. Mıllıondardy sýǵa aǵyzǵansha, ózge ıgilikti isterge jumsaýǵa bolmas pa edi? Onyń ústine buǵan deıin qala ákiminiń orynbasary Svetlana Gladysheva jaýapty fırma qalashyqqa muz ǵana emes, plastık pen aǵash materıaldardy paıdalanyp jatqanyn, aýa raıy jyly bolǵan jaǵdaıda qalashyqty shahar turǵyndary men qonaqtary emin-erkin qyzyqtaı alady dep sendirgen. Saıyp kelgende, memlekettiń qarjysy jelge ushqan jaǵdaımen teń bul.
«Muz qalashyǵynyń erip jatqany jurttyń Jańa jyl meıramy aldyndaǵy jaqsy kóńil kúıine kádimgideı áser etip otyr. Aýyldan nemerelerimiz kelip, olardy mereke kúnderi qydyrtamyz dep josparlap qoıyp edik. Estýimshe, 50 mıllıon teńgeden astam aqsha jumsalypty. Bizdiń túsimizge kirmeıtin qarajat qoı bul. Esil ketken qaıran aqsha? Odan da bul qarajat joq-jitikke, múmkindigi shekteýli jandarǵa kómek retinde taratylsa bolmas pa edi? Meıram aldynda qamkóńil jandardy qýantar edik dep oılaımyn», deıdi qala turǵyny Erjan Serikov.
Qalalyq turǵyn úı-kommýnaldyq sharýashylyq bóliminiń bas mamany Ǵızat Smaıylovtyń aıtýynsha, muz qalashyq pen syrǵanaqtarǵa merdiger fırma kepildik bergen. Aldaǵy kúnderi qulap, erip ketken bólikterin qaıta qalpyna keltiredi dep sendirip otyr. Alaıda kóp bóligi sý bolyp aǵyp ketken keskinderdi qaıta qalpyna keltirý úshin jaýapty fırma qosymsha qarajat shyǵyndaı qoıar ma eken?
Buǵan deıin óńirlik ekonomıkalyq tergep-tekserý departamenti men antıkor qyzmetiniń ókilderi qala bıliginiń jańajyldyq meıramǵa osynshama mol qarjy shyǵyndaǵanyna tekserý júrgiziledi dep málimdegen. Endeshe, erip jatqan mıllıondardyń suraýy bolady dep úmittenemiz.
PAVLODAR
