Foto: gov.kz
Zulharnaı Seıitov 1922 jyly 27 jeltoqsanda Omby oblysy, Jańa Qypshaq aýylynda dúnıege kelgen. 1942 jyly Qyzyl Armııa qataryna shaqyrylyp, Sverdlovsk oblysyndaǵy Týrınsk qalasyna áskerı is boıynsha oqýǵa jiberiledi. Sol jyly ol Lenıngrad maıdanyna attanyp, onda 2-shi ekpindi armııa quramynda shaıqasady. Keıinnen saper kýrstary boıynsha arnaıy daıyndyqtan ótedi. Dıversanttar men tártip saqshylarynyń mańyzdy jaýyngerlik jumysyn atqarǵan qyzmettik ıttermen ol Stalıngradtan Belorýssııa men Polsha arqyly ótip, Berlınge jasalǵan shabýylǵa qatysady. Maıdanger Stalıngrad shaıqasynda qan tógip, Belorýssııa men Polshany azat etti, Berlınge jetip, Potsdam kóshelerin mınadan tazartýǵa qatysty. Jaýyngerlik eńbegi úshin kóptegen medaldarmen marapattaldy.
Soǵystan keıin Zulharnaı Seıitov Omby aýyl sharýashylyǵy ınstıtýtyn támamdap, Qazaqstanǵa jiberiledi. Munda ol bıologııa ǵylymdarynyń doktory jáne akademık boldy. Áriptesterimen birge «Qazaq balzamy» jáne «Altynsý» emdik sýsyndaryn ázirleýge qatysty. Qymyz, shubat, bıe jáne túıe sútin qurǵaq daıyndaý tehnologııalaryn jasady.
Eńbek sińirgen ǵylym qaıratkeri Zulharnaı Seıitov 150-den astam ǵylymı jumystar men monografııalardyń, 14 patent pen 8 avtorlyq kýáliktiń, 10 oqý quralynyń, onyń ishinde qazaq, orys, aǵylshyn tilderindegi «Bıohımııa» oqýlyǵynyń avtory. Onyń kóptegen ázirlemeleri men jańalyqtary medısınada da, tamaq ónerkásibinde de keńinen qoldanylady.
