Sýretti túsirgen – Jeńis Ysqabaı
О́tip bara jatqan jyl Jetisý úshin tabysty boldy. Qaı salany alyp qarasańyz da ilgerileý bar. О́tken 11 aıda ekonomıkalyq ósý qarqyny 113,9 paıyzǵa jetip, óńir respýblıkada birinshi orynǵa ıe boldy. Sonyń ishinde shaǵyn jáne orta bıznes salasy qarqyndy damyp keledi. Bul rette áıel kásipkerlerdiń eńbegi eleýli. Ony Jetisý isker áıelder keńesiniń qoldaýymen ótken oblystyq isker áıelder forýmynda óńir basshysy Beıbit Isabaev ta aıtty.
«Oblys halqynyń 50 paıyzdan astamy áıelder bolsa, onyń 42 paıyzy nemese 148,2 myńy ekonomıkalyq belsendi halyq qatarynda, sonyń 139 myńǵa jýyǵy jumyspen qamtylǵan. Áıelder kásipkerlikti damytýdyń ulttyq jobasynyń barlyq baǵytyna belsendi qatysatyny qýantady. Máselen, bıyldyń ózinde halyqtyń áleýmettik osal toptarynyń ishinen 139 áıel kásipkerlik bastamalaryna shamamen 192 mln teńge kóleminde grant aldy. Jastar arasynan taǵy 123 qyz-kelinshekke 563,4 mln teńge mólsherinde 2,5 paıyz jeńildikti syıaqy mólsherlemesimen shaǵyn nesıe berildi. Biz áıelder kásipkerligin qoldaýdy jalǵastyra beremiz. Sizder tarapynan tek jumys isteýge degen umtylys bolsa, jaqsy bıznes-josparlaryńyzdy qarjylandyrý, granttar berip, nesıeleý – bizdiń mindetimiz», dedi B.Isabaev.
Onyń aıtýynsha, áıelder bilim berý, densaýlyq saqtaý, áleýmettik qorǵaý salalarynda belsendi. Mysaly, Panfılov aýdanynyń turǵyny Tursyn Konchıbaeva aýdanda 5 balabaqsha ashyp, 700-den astam aýyl balalaryn mektepke deıingi bilimmen qamtamasyz etken. Sondaı-aq 100-den astam jergilikti turǵyndy jumysqa ornalastyrǵan. Golovaskıı aýylynda ardager pedagog 210 oryndyq balabaqsha ashqan. Kásipker 10 jyldan beri qoǵamǵa paıdaly bıznespen aınalysyp keledi.
Atalǵan forýmǵa 140-qa jýyq kásipker áıel keldi. Osy oraıda oblys ákimi birqatar kásipker áıeldi quttyqtap, isker hanymdarǵa marapattar tapsyrdy. Atap aıtsaq, «Atameken» Qazaqstan Respýblıkasy Ulttyq Kásipkerler palatasynyń III dárejeli «Isine adaldyǵy úshin» medali birneshe jyl boıy kondıterlik jáne nan-toqash ónimderi men etti jartylaı fabrıkattar óndirýmen aınalysyp kele jatqan «Lad» JK basshysy Agafıa Lıge berildi. Osyndaı medalmen jańa saýylǵan túıe sútinen ónim óndirýge mamandanǵan «UNI FORES» JShS-nyń dırektory Lázzat Chaıgaraeva marapattaldy.
Oblystyq isker áıelder keńesi ótkizgen konkýrs qorytyndysyna sáıkes atalymdar boıynsha 20-ǵa jýyq jeńimpaz áıelge aqshalaı sertıfıkattar tabystaldy. Taǵy birneshe adamǵa oblystyq basqarmalar men Kásipkerler palatasy oblystyq fılıalynyń Alǵys hattary tabys etildi.
Bıznes-forým aıasyndaǵy kórmede sút, kondıterlik jáne nan-toqash ónimderi, djemder, qaqtar, sabyn jáne shópten t.b. tabıǵı ıngredıentterden jasalǵan kosmetıkalyq spreıler, kıizden, sazdan jasalǵan buıymdar, túrli qoldanbaly óner buıymdary, aıaq kıim jáne basqa da kásipker áıelderdiń óndirgen ónimderi usynyldy. Oblystyń ár túkpirinde shyǵarylyp jatqan bul ónimderdi jasaýǵa memlekettik qoldaý sharalary kóp yqpalyn tıgizip otyr.
Jasyratyny joq, aýyl-aımaqtarda da kásipkerlikti damytýǵa barynsha kóńil bólinýde. Osy rette Kóksý aýdanynyń ortalyǵy Balpyq bı kentiniń turǵyny Dıana Dostybaı eńbegine toqtala ketsek. Búginde kondıterlik ónimderge tapsyrys qabyldap, ıgiligin kórýde. Memlekettik qoldaýdyń nátıjesinde eki balaly ananyń bastamasy kópke qýanysh syılaýda. О́ziniń aıtýynsha, tátti ónimderin shyǵarýǵa qyzyǵýshylyǵy men qabileti bala kezinen bastalǵan. Sol sebepten osy baǵytta bıznes ashýdy jón kóripti. Qazir bálish, boıaýsyz traıfl, pırog, baýyrsaq jáne táttilerdiń túr-túrin irgedegi aýyl turǵyndaryna jetkizedi.
«Tátti toqash pisirýdi bala kezden unatatyn edim. О́z isimdi ýnıversıtet aıaqtaǵannan keıin bastadym. Basynda qyzyǵýshylyǵym artyp, táttilerge túrli dám qosyp, jasadym. Keıin kórshi-qolańǵa táttilerim unap, olar menen osy ónimderdi satyp ala bastady. Sol kezde maǵan óz isimdi ashý týraly oı keldi. Qazir kásibim jyl sanap ilgerilip keledi», deıdi jas kásipker.
Eń qyzyǵy, Dıana buǵan deıin esh jerde jumys istemegen. Oqýyn támamdap, birden jeke isin bastaýdy jón kóripti. «Bastaý Bıznes» jobasy boıynsha kásipkerlik negizderinen ótip, memleketten 1 mln 380 myń teńge kóleminde qarajat alý úshin qujat tapsyrady. Komıssııanyń oń sheshimimen grant ıegeri atandy. Memleket bergen qarjyǵa gaz, nan ılegish, vıtrına, mıkser jáne t.b. kerek qural-jabdyqtar satyp alyp, óz isine batyl kirisken. Jas kásipkerdiń alǵa qoıǵan maqsattarynyń biri – úlken kondıterlik seh ashý. Aldaǵy ýaqytta óz kásibin júrgizýge jeke jaldamaly oryn alyp, keńeıtýdi josparlap otyr.
О́ńir ákiminiń baspasóz qyzmetiniń málimetinshe, óńirde 59 myń shaǵyn jáne orta bıznes sýbektisi tirkelgen. Onda 110 myń adam jumyspen qamtylǵan, bul ótken jylmen salystyrǵanda 14,1 paıyzǵa artyq. Búginde barlyǵy 219 grant berilgen.
Jetisý oblysy
