Sýretti túsirgen – avtor
2024 jyldyń 1 qańtarynan bastap, Katonqaraǵaı aýdanynyń ákimshilik ortalyǵy Úlken Naryn aýylynan Katonqaraǵaı aýylyna kóshiriletin boldy. Sol sekildi Kúrshim aýdanynyń quramynan bólý jolymen Marqakól aýdany qurylady.
Bul jańalyqty estigen Katonqaraǵaı men Marqakól turǵyndarynyń qýanyshtary qoıyndaryna syımady. Katonqaraǵaılyqtar keshkilik mádenıet úıine jınalsa, Marqakól jurty aýyldyń kireberis qaqpasynda bas qosyp, Prezıdent Qasym-Jomart Toqaevqa beınerolık arqyly alǵystaryn jetkizdi.
– Qurmetti Qasym-Jomart Kemeluly, Jańa jyl qarsańynda siz bizdi qýanyshqa bólep otyrsyz. Katonqaraǵaı jeke aýdan boldy. Sizge zor alǵysymyzdy aıtamyz! – dedi aýdan turǵyny, ardager jýrnalıst Jánibek Qyzyr.
Sol sekildi shekara shebinde jatqan Marqakól turǵyndary da aqjarma tilekterin jaýdyryp jatty.
Qýansa qýanǵandaı. Máselen, Marqakóldiń túý túkpirindegi Balyqtybulaq, Shanaǵatty sekildi aýyldyń turǵyndary tildeı qaǵaz úshin 200-300 shaqyrymdy basyp ótip, aýdan ortalyǵy – Kúrshimge sabylysty. Saırap jatqan bolsa, taǵy birsári. Taý qoınaýyndaǵy aýyldardyń aýdan ortalyǵyna jetýleri beınet edi. Sol sııaqty Katonqaraǵaıdyń arǵy basyndaǵy Arshaty, Berel eli de júzdegen shaqyrymdy artqa tastap, Úlken Narynǵa shabyldy. Prezıdent Qasym-Jomart Toqaev halyq únine qulaq asyp, el tilegin oryndady. Iá, memleket basshysyna Shyǵys Qazaqstan turǵyndarynyń alǵysy sheksiz.
Álbette, qurylǵan aýdandar bir kúnde aıaqtan turyp kete qoımas. Deıturǵanmen, resmı túrde derbes aýdan bolyp, jumys isteıtin bolady. Tarıhı sáttiń basynda turǵan jaýapty jumysshylar úshin ońaı bolmasy anyq. Dese de, Jańa aýdannyń halqy bir jaǵadan bas, bir jeńnen qol shyǵaryp, jumyla kiriskenderi durys shyǵar.
Shyǵys Qazaqstan oblysy
