Aqsý qalasyndaǵy elektr stansasy óziniń 55 jyldyǵyn atap ótti. Mereıtoıǵa oraı shahar turǵyndaryna erekshe syı tartý etýdi oıǵa alǵan kásiporyn eń áýeli óz qyzmetkerleriniń mártebesin eskerse kerek. Mereıli mamandyq ıeleriniń beınesin úlken kóshelerdiń birindegi kópqabatty úıdiń qabyrǵasyna túsirýdi oıǵa alǵan. Muraldy salý ıdeıasyn jergilikti sáýlet jáne qala qurylysy bóliminiń mamandary birden qoldap, qolaıly oryn usynǵan. «Áýezov kóshesi, 55 mekenjaıy qalaǵa kire beris aınalma jol boıynda ornalasqan. Ortalyq kóshe bolǵandyqtan óte ádemi kórinedi», deıdi memlekettik mekeme basshysy Kırıll Efremov. Muraldaǵy beıneniń ózi jasandy ıntellektiniń kómegimen jasalypty.
Aqsýdaǵy eńbek adamyna degen qurmetti bildiretin alǵashqy mural kópshiliktiń kóńilinen shyqty. Turǵyndar úılerine jaryq pen jylý berip otyrǵan mamandyq ıeleriniń beınesi qalaǵa sán qosyp turǵanyn aıtady.
– Energetıkterdiń jumysy kózge kórinbeıdi. Úıimizge kelip turǵan elektr jaryǵy men jylýdyń artynda qanshama adamnyń eren eńbegi tur. Biz osy mural arqyly energetık mamandyǵynyń mańyzyn qoǵamǵa kórsetkimiz keldi. Elimizdegi energetıka salasynyń damýy da osy jandardyń qolynda, – deıdi «EEK» AQ Aqsý elektr stansasynyń operasııalyq dırektory-bas ınjeneri Danııar Shabanbaev.
Pavlodar oblysy,
Aqsý qalasy
