Aýyl adamdary bárinen buryn dárigerlik ambýlatorııanyń jańartylǵanyna máz. Eski ǵımaratty tolyqtaı jóndeýge, medısınalyq qural-jabdyqtarmen jabdyqtaýǵa oblys bıýdjetinen 81 mln teńge bólinipti. Merdiger «Vıntreıd» kompanııasy barlyq jumystardy ýaqtyly aıaqtap, jyl sońynda halyq ıgiligine tapsyrdy.
Aýdandyq aýrýhananyń bas dárigeriniń mindetin atqarýshy Baqytgúl Qabjaparovanyń aıtýynsha, bıyl atalǵan óńir boıynsha Jalaýly, Mútkenov, Áýelbek aýyldaryndaǵy dárigerlik ambýlatorııalar jańartylǵan. Ári emdeý mekemelerine jańadan jedel járdem kólikteri de satyp alynypty.
– Eski ǵımarat bolǵandyqtan, Áýelbektegi ambýlatorııany tolyqtaı jóndeýge týra keldi. Tek qabyrǵalary ǵana qalyp, ózge bólikteri tolyqtaı aýystyryldy. Jańadan jıhazdar, medısınalyq quraldar jetkizildi. Budan bylaı aýyl adamdary aýyra qalsa emdeý is-sharalarynan soń fızıokabınetine kelip, ońaltý prosedýrasynan óte alady. Jańa kabınette barlyq jaǵdaı qarastyrylǵan, – deıdi aq jeleńdi.
Negizi Áýelbektegi emdeý mekemesi О́tes, Qaraoba, Jańaýyl, Isanterek aýyldaryndaǵy medısınalyq pýnktterdi biriktiredi. Iаǵnı atalǵan eldi mekenderdiń halqy munda kelip emdele alady degen sóz. Medısınalyq uıymda eńbek ótili 30 jyldan asatyn dáriger Baıan Temirbolatqyzy men eki medısınalyq qyzmetker turaqty qyzmet kórsetedi. Sońǵy ekeýi bıyl kóshi-qon baǵdarlamasy aıasynda ońtústikten qonys aýdaryp kelipti. Aýmaq boıynsha 1400 turǵyn dárigerlik ambýlatorııanyń kómegine júgine alady.
Bul kúni aýylda jóndeýden ótken mádenıet úıi de tusaýyn kesti. Onyń jóndeýine qazynadan 156 mln teńge jumsalǵan. Ǵımarattyń esik-terezesi, baspaldaqtary, jylý júıesi tolyqtaı jańardy. Nysannyń birinshi qabatynda voleıbol, basketbol, shaǵyn fýtbol oınaıtyn sport zaldary qarastyrylǵan. Al ekinshi qabatynda 80 oryndyq konsert zaly, kitaphana, ardagerler klýby, klýb qyzmetkerleri men dombyra kabıneti, sondaı-aq dombyra kovorkıng ortalyǵy ornalasqan.
Pavlodar oblysy,
Aqtoǵaı aýdany,
Áýelbek aýyly
