Oqý-aǵartý mınıstrligine mektepke deıingi, orta, kásiptik tehnıkalyq bilim sapasyn arttyrý mindeti júktelgen. Mindetke sáıkes jospar da daıyn. Jospardyń jobasyna zer salsaq, 2030 jylǵa qaraı 6 jasqa deıingi balalar mektepke deıingi sapaly bilimmen jáne tárbıemen tolyq qamtylady. Mektepke deıingi bilim berý men tárbıe baǵdarlamalary halyqaralyq tájirıbede paıdalanylatyn úzdik standarttar men ádisnamalarǵa saı keletin bolady.
2050 jylǵa qaraı elimizdegi orta bilim berý júıesin damytý úshin memlekettik-jekeshelik áriptestik jelisin qurý kózdelgen. Bilim berý saıasaty fýnksıonaldy saýattylyqty túbegeıli arttyrýǵa, zamanaýı quzyrettilikti qalyptastyrýǵa, jas býyndy syndarly áleýmettendirýge, bilim alýdyń qoljetimdiligine, sondaı-aq oqytý sapasyndaǵy óńirlik teńsizdikti tómendetýge baǵyttalady. Sonymen qatar tájirıbelik daǵdylardy oqytý jáne tájirıbelik biliktilikti alý boıynsha baǵdarlamalardy qosa otyryp, orta bilim berýdiń oqý josparlarynyń jáne baǵdarlamalarynyń baǵyty men ekpinin ózgertý josparlanǵan.
Al orta, tehnıkalyq jáne kásiptik bilim beretin uıymdardyń barlyǵynda 2030 jylǵa qaraı ujymdyq basqarý jáne akademııalyq derbestik qaǵıdattary engiziletin bolady. Tehnıkalyq jáne kásiptik bilim berý júıesin damytý eńbek naryǵynyń burynnan bar jáne bolashaq qajettilikterin qanaǵattandyrýǵa baǵyttalady. Kásipkerlikke baǵdarlanǵan oqý baǵdarlamalary, bilim berý kýrstary men ınstıtýttary qurylady.
Aıtylǵan nátıjege qol jetkizý úshin bilim salasynda bıyl atqarylatyn jumystar aıqyndaldy. Oqý-aǵartý mınıstrliginiń resmı málimeti boıynsha halyqtyń áleýmettik osal toptarynan shyqqan balalardy derbes mektepke deıingi tárbıeleý qyzmetterine qol jetkizý, úıdegi tárbıeshiler ınstıtýtynyń tájirıbesin qoldaný jospary osy jyly oryndalady. Buǵan qosa mektepke deıingi oqytý men tárbıeleý sapasyna monıtorıng engiziledi. Al jumys isteý quqyǵy mektepke deıingi qyzmetterdiń sapasyn jetildiretin jáne jaqsartatyn mektepke deıingi uıymdarǵa beriledi. Sonymen qatar mektepke deıingi tárbıe men oqytý mazmunyn jańartý kezinde bastaýysh bilimmen birdeı tásilder men uǵymdar paıdalanylady. Bilim berý mazmunyna barlyq jas toptary men synyptarda mazmundy biriktirý tásili retinde «ótpeli taqyryptar» engiziledi. Sapany arttyrý, sondaı-aq tolyqqandy damytýshy jáne qaýipsiz orta qurý, bilim berý úrdisin júzege asyrý jaǵdaılaryn qamtamasyz etý, normalar men qaǵıdalardy saqtaý, tárbıelenýshilerdiń densaýlyǵyn saqtaý, pedagogterdiń kásibı quzyrettiligin arttyrý jáne shtattardy jasaqtaý úshin mektepke deıingi bilim berý uıymdary kezeń-kezeńimen lısenzııalanady.
Orta bilim boıynsha oryn tapshylyǵyn azaıtý úshin 1,5 mln oqýshy orny ashylady. Tirek aýyldar men aýdan ortalyqtarynda shaǵyn aýyldardyń balalaryn ınternattarda nemese patronat otbasylarda turý úshin oryndarmen 100 paıyz qamtamasyz etiledi. Barlyq mektep ǵımarattary sanıtarlyq toraptarmen, kompıýterlermen jabdyqtalady. Internetke qol jetkizý jyldamdyǵy 50 MGb/sek tómen emes jáne lımıttelmegen trafıkpen qosylady. Barlyq mektepte otandyq óndiris jabdyqtaryn qoldana otyryp, symsyz jelileri óristetiletin bolady. Biryńǵaı ıntegrasııalanǵan bilim berý onlaın-platformasy iske qosylady. Buǵan qosa bıylǵy oqý jylynda mekteptegi bilim berý baǵdarlamalaryna oqýshylardyń emosıonaldy, fızıkalyq jáne psıhıkalyq ál-aýqatynyń negizi bolatyn turaqty damý, shyǵarmashylyq sana, salaýatty psıhoemosıonaldy damý komponentteri engiziledi. Oqýshylardyń oılaý daǵdylaryn qarapaıym deńgeıden joǵary deńgeıge deıin kóterip, qalyptastyrýǵa basymdyq beriledi.
Mınıstrliktiń josparyna sensek, muǵalim tapshylyǵy joıylady, kásibı quram jaqsarady. Pedagog ataǵyna quqyq ulttyq biliktilik testileriniń nátıjeleri boıynsha beriletin bolady, al attestattaý júıesi oqýshyny oqytýdyń naqty nátıjelerine baǵdarlanady. Informatıka men fızıka páninen sabaq beretin aýyl muǵalimderine, sondaı-aq robottehnıka men baǵdarlamalaý boıynsha aýdandyq jarystar men týrnırlerdiń jeńimpazdaryn daıyndaǵan pedagogterge erekshe nazar aýdarylady, olardyń jalaqysyna qosymsha ústeme júıelerden basqa yntalandyrý sharalary da ázirlenedi.
Al tehnıkalyq jáne kásiptik bilim berý júıesindegi jumystar 2024 jyly kepildendirilgen birinshi kásip daǵdylaryn alý, ishki kóship-qonýshylardy qala ekonomıkasyna beıimdeý, sondaı-aq sektoraralyq aǵyndar kezinde jańa talaptarǵa jumys kúshin beıimdeý jónindegi mindetterdi sheshýge baǵyttalady.
Memlekettik bilim berý tapsyrysy negizinde tegin kásibı bilim alýǵa tilek bildirýshiler tolyq qamtylady. Bilim berý baǵdarlamalary jumys berýshilerde suranysqa ıe sapaly kásibı jáne áleýmettik daǵdylardy usynýǵa baǵyttalady. Sonymen qatar bıyl mınıstrlik tarapynan tehnıkalyq jáne kásiptik bilim berý uıymdarynyń tıimdi basshylaryn anyqtaýǵa jáne olardyń kóshbasshylyq qabiletin damytýǵa baǵyttalǵan joba iske qosylady.
Oqý-aǵartý mınıstrliginiń málimetinshe, jumys berýshilerdiń qyzmetkerlerge qoıatyn talaptary kórsetilgen kásiptik standarttardy ázirleý boıynsha jumys jalǵasa beredi. Al «Jas maman» jobasy aıasynda jaraqtandyrylǵan kolledjder bazasynda kadrlardy ozyq daıarlaý ortalyqtary qurylady. Sondaı-aq osy jyly kolledjder arasynda ashyqtyq pen básekege qabilettilikti qamtamasyz etý úshin «Stýdentke aqsha» qaǵıdaty boıynsha kolledjge qabyldaýdyń jańa formaty engiziledi.
