Foto: vıdeodan skrın
4 qańtar kúni tańerteń saǵat 10:45 shamasynda Tarazda №56 baǵyttaǵy avtobýstyń 33 jastaǵy júrgizýshisi róldi basqara almaı qalǵan. Ile-shala qarsy betke shyǵyp ketip, toqtap turǵan 10 kólikke soqtyǵysqan.
Avtobýs ishinde 10 jolaýshy bolǵan. Oqys oqıǵa saldarynan 56 jastaǵy áıel jaraqat alyp, aýrýhanaǵa jetkizildi.
Aımaqtaǵy polısııa basqarmasy ókiliniń sózinshe jol apatyna avtobýs júrgizýshisiniń rólde uıyqtap ketkeni sebep bolǵan.
«Deni saý, salmaqty júrgizýshi eken. Bir sátke kózi ilinip ketken. Kózin ashqanda ǵana jol apaty bolǵanyn túsingen», dedi Taraz qalalyq IIB patrýldik polısııa batalonynyń komandıri Rýslan Orazbaqov.
Ol qoǵamdyq kólik pen jol qozǵalysyna qatysy bar mamandardyń barlyǵy, sonyń ishinde polısııa qyzmetkerleri de tańerteń jumysqa shyǵar aldynda dárigerlik tekseristen ótetinin de tilge tıek etti. Rýslan Orazbaqov júrgizýshilerdiń rólde sergek bolýyna tek ózderi jaýapty ekenin eskertti.
Atalǵan fakti boıynsha avtobýs júrgizýshisine qatysty QR Qylmystyq kodekstiń 345-baby boıynsha sotqa deıingi tergeý amaldary bastaldy. Qajetti saraptamalar taǵaıyndaldy.
