Jobanyń negizgi maqsaty – qoǵamda sybaılas jemqorlyqtyń barlyq kórinisine tózbeýshilik ortasyn qalyptastyrý jáne bul prosesske el azamattaryn jappaı tartý.
Atalmysh joba Memleket basshysy atap ótken «Adal azamat» tujyrymdamasyn júzege asyrý men qoǵamdaǵy zań jáne quqyqtyq tártip ústemdigin qalyptastyrýdaǵy naqty qadamdardyń biri bolmaq.
«Biz quqyq buzýshylyq jasaý, para berý nemese álsizge qolyn kóterý týraly oıdyń ózin aıyptaıtyn qoǵamǵa aınalýymyz kerek. Bul qıyn jumys, biraq bul joldy eńserýimiz qajet. «Ádildik joly» komandasy 2 jyl boıy belsendi jumys istep, qoǵamda quqyqtyq saýattylyq boıynsha olqylyqtar bar ekenine kóz jetkizdi. Osy ýaqyt aralyǵynda adildik.kz saıty men 1463 baılanys ortalyǵyna túsken 8 myńǵa jýyq azamattyń ótinishin qarastyra kele, halyqtyń zań men ereje týraly bilimderin arttyrý arqyly kóp máselelerdi qylmysqa aparmaı sheshýge bolatynyna senimdimiz», dep atap ótti «Ádildik joly» RQB atqarýshy dırektory Dıdar Smaǵulov.
Atap aıtqanda, «Ádildik joly» birlestigi uıymdastyrǵan jumystyń arqasynda 1206 tulǵa túrli zań buzýshylyqtary úshin ákimshilik jaýapkershilikke tartylyp, aıyppul tólep, 800 mln teńgeden astam qarajat bıýdjetke qaıtarylyp, 76 qylmystyq is qozǵalǵan.
«Zań ústemdigi» jobasyna Qazaqstannyń kez kelgen azamaty qatysa alady. Árbir turǵyn sybaılas jemqorlyq faktileri (kez kelgen saladaǵy) men basqa da máselelerin 1463 Call-ortalyǵy nemese Adildik.kz saıty arqyly habarlap, óz saýaldary boıynsha quqyqtyq keńester men kómek ala alady.
