Depýtattar oblys aktıvi – Ardagerler keńesiniń múshelerimen, oblystyq máslıhat depýtattarymen jáne jurtshylyqpen óńirdiń damý barysyn talqylady.
Oblys ákimi Berik Ábdiǵalıuly aımaqty damytýdaǵy basym baǵyttarǵa toqtaldy. Oblys ortalyǵynyń ınfraqurylymyn jańǵyrtý jáne keńeıtý, Jezqazǵan qalasynyń jańa bas josparyn qabyldaý, Sátbaev qalasyn qosa otyryp, ekinshi Jylý elektr ortalyǵynyń salynýyn qarastyrý máseleleri – birinshi kezekte tur. Sondaı-aq eki jyldyń ishinde 3600 oryndyq 6 jaıly mektep salynyp, perınataldyq ortalyq, sport nysandary jáne jańa turǵyn úı qurylysy josparlanǵan.
Erlan Qoshanov Memleket basshysynyń bastamasymen Ulytaý oblysynyń qurylýy búkil el úshin mańyzdy oqıǵa ekenin atap ótti. Sondyqtan Prezıdent, Parlament, Úkimet jańa óńirdiń damýyna erekshe kóńil bóledi.
«Ulytaý oblysy – óz aldyna otaý tikken derbes, ekonomıkalyq, áleýmettik, mádenı damý áleýeti zor óńir. Oblysqa tartylǵan ınvestısııa kólemi ótken jylmen salystyrǵanda 45 mlrd teńgege artyp, 171 mlrd teńgeden asty. 67 myń sharshy metr baspana paıdalanýǵa berildi. Bul óńirdiń jaqsy damý dınamıkasyn kórsetedi», dedi Májilis tóraǵasy.
Sondaı-aq sapar barysynda Jezqazǵan baıytý kombınaty, JEO jáne Sátbaev qalasyndaǵy «Annenskaıa» kenishiniń jumysshylarymen kezdesýler josparlanǵan.
