Altyn kenishinde jer astyna avtobýspen birge túsip ketken eki adamdy izdeý jumystary kúni-túni jalǵasyp jatyr. Oıyq shetindegi topyraqtyń tómenge qaıta-qaıta syrǵýy qutqarý jumystarynda júrgen azamattarǵa qaýip týdyryp tur. Keshe túste jedel shtab habarlaǵandaı, qutqarý is-sharalarynda jer astyn barlaıtyn arnaıy geologııalyq skaner qurylǵysy paıdalanylyp, qutqarýshylardyń jumysy jeńildeı túsken.
Jeksenbi kúni oıyqtyń erneýine «Bogatyr Kómir» kásipornynyń úlken krany ornatyldy. «AK Altynalmas» AQ men Pavlodar oblystyq tótenshe jaǵdaı departamentiniń mamandary álgi krannyń kómegimen shuńqyr tabanyna mamandardy túsirip, Balqash qalasynan jetkizilgen geologııalyq radardyń kómegimen topyraq qabatyn skanerledi. Nátıjesinde, avtobýstyń jatqan orny shamalandy.
– «Maıqaıyńaltyn» AQ taý-ken aýdanyndaǵy opyrylǵan jerde izdestirý jumystaryn jalǵastyrýdamyz. Geologııalyq skanerdiń nátıjeleri óńdelip, shamamen avtobýstyń ornalasqan jeri anyqtaldy. Kólik jatqan jerge deıingi yqtımal tereńdik 5-7 metrdi quraıdy. Shaǵyn ekskavatordy shuńqyrǵa túsirý josparlanyp otyr. Ony oıyq tabanyna jetkizý úshin transheıa daıyndaý jumystary pysyqtalyp, qutqarýshylardyń ári qaraıǵy is-qımyldaryn kúsheıtý týraly sheshim qabyldandy. Qaza tapqan jáne joǵalǵan qutqarýshylardyń otbasylaryna «Maıqaıyńaltyn» AQ jáne KÁAQQ ROSh tarapynan 4,5 mln teńgeden astam mólsherde materıaldyq kómek kórsetiledi. Memleket tarapynan marqumdardyń otbasylaryna asyraýshysynan aıyrylý boıynsha áleýmettik tólemder taǵaıyndalady. Qaza bolǵan eki qutqarýshynyń otbasylaryna qaıǵyryp kóńil aıtamyn, – dedi oblys basshysy Asaıyn Baıhanov.
Maıqaıyń kentinde búginde 9 myńnyń ústinde halyq turady. Kenish aýyldyń dál irgesinde ornalasqandyqtan, jergilikti turǵyndar kóp jyldan beri ekologııalyq ahýalǵa alańdap keledi. Oıyq paıda bolǵan keńistik ústinde altyn kenishine aparatyn jol bolǵan. «Álgi aýmaqta únemi sý jınalyp, oıpań bolyp jatatyn. Al onyń astyndaǵy kenish kamerasynyń tóbesinen únemi sý sorǵalap bolmaǵan soń, ol jerdi shahta basshylyǵy jaýyp tastaǵan. Biz bul aýmaqtaǵy jol asa qaýipti ekenin, kólikterdi basqa aýmaqpen júrgizý qajettigin kompanııa basshylyǵyna talaı márte aıtqanbyz. Alaıda bizdiń usynys-pikirimizdi aksıonerlik qoǵam basshylary qulaǵyna da ilmedi. Kenishtiń shahtasynda jýyqta respýblıkalyq arnaıy komıssııa bolyp ketkenin estidik. Olardyń kózine eski shahta ishindegi kemshilikter qalaı túspegenine tańbyz. Bul máselelerdi aıtýǵa júreksinemiz. Sebebi altyn kenishi men ken baıytý fabrıkasynan ózim, balalarym, tipti týystarym nan taýyp jep otyrmyz. Aınaladaǵy jurttyń kóbi solaı. Kompanııa basshylary bizdi qýdalaýy múmkin», deıdi aty-jónin jasyryp qalǵysy kelgen maıqaıyńdyq azamat.
Maıqaıyń kenti ákimdiginen alynǵan málimetke súıensek, qazir «Maıqaıyńaltyn» AQ-da jalpy sany 1 012 adam eńbek etedi. Aksıonerlik qoǵamnyń quramynda búginde eki kenish toby men ken baıytý fabrıkasy, kólik sehy, kólik jóndeý sheberhanalary men hımııalyq zerthana, ózge de qurylymdyq bólimsheler bar. Kásiporyn óz tarıhynda 80 tonna altyn, 1 240 tonna kúmis, al jalpy kólemi 16,7 mln tonna ken óndirgen.
Aıtyp óteıik, avtobýsta bolǵan tórteýdiń barlyǵy – kásibı áskerılendirilgen avarııalyq-qutqarý qyzmetteriniń respýblıkalyq ortalyq shtaby Pavlodar fılıalynyń qyzmetkerleri. Qutqarý qyzmetiniń resmı saıtynda kórsetilgendeı, Pavlodarlyq fılıalda shamamen 209 adam eńbek etse, onyń 36-sy «Maıqaıyńaltyn» AQ-nyń óndiristik bazalaryna jaýapty bolǵan. Budan bólek, kásibılendirilgen mekeme Ekibastuzdaǵy jáne Bozshakóldegi ken oryndaryna qyzmet kórsetedi. Qutqarýshylar altynshy táýlik izdep jatqan avtobýs ishinde atalǵan qutqarý qyzmetiniń jedel aldyn alý jumystary jónindegi vzvod komandıriniń orynbasary Aıdos Shaımerden (36 jasta) men jedel avtokólik júrgizýshisi Aıyp Tileýbergenov (55 jasta) bar. A.Shaımerden – 5 balanyń ákesi, jubaıy ekeýi 4 er, 1 qyz balany tárbıelep ósirgen. Al 12 qańtar kúni 56 jasqa tolatyn avtobýs júrgizýshisi A.Tileýbergenovtiń otbasynda múgedek qyz bala bar dep habarlandy. Eki azamat ta – Maıqaıyń kentiniń turǵyndary.
Pavlodar oblysy,
Baıanaýyl aýdany,
Maıqaıyń kenti
