Máýlen Áshimbaev atap ótkendeı, Prezıdent Qasym-Jomart Toqaevtyń bastamasymen júzege asyp jatqan reformalardy zańnamalyq qamtamasyz etý jáne óńirlerdi damytýǵa járdemdesý – Senattyń máslıhattarmen birlesken jumysyndaǵy negizgi baǵyttar. Osy oraıda senatorlar osy jyldy da dástúr boıynsha oblystar men aýdandardyń turǵyndarymen kezdesýden bastady. О́ńirlerdi damytý perspektıvalaryn talqylaý jáne mundaǵy ózekti máselelerdi sheshý – sharalardyń negizgi maqsaty bolyp otyr.
M.Áshimbaev Atyraý oblysynyń turǵyndarymen kezdesý barysynda Memleket basshysynyń «Egemen Qazaqstan» gazetine bergen suhbatynda belgilengen mindetterge nazar aýdaryp, barlyq otandasymyzdy olardy iske asyrý tóńireginde kúsh biriktirýge shaqyrdy.
«Prezıdent Qasym-Jomart Toqaev suhbatynda demokratııalyq reformalardyń júıeli ǵana emes, eshqashan keri qaıtpaıtyn túbegeıli sıpatqa ıe bolǵanyn qadap aıtty. Jalpy, ótken jyly azamattarymyzdyń konstıtýsııalyq quqyǵynyń qorǵalýyna kepil bolatyn joǵarǵy organ – Konstıtýsııalyq sot jumysyn bastady. Alǵash ret azamattarymyz aýdan jáne oblystyq mańyzy bar qala ákimderin tikeleı saılady. Osy jáne ózge de jetistikter men bastamalar bıyl da joǵary kórsetkishterge qol jetkizýimizge berik negiz bolady dep senemiz. Jalpy, búginde elimizdiń aldynda aýqymdy maqsattar tur. Ol maqsattarǵa birlesip áreket etkende ǵana jetetinimiz sózsiz», dep atap ótti Senat tóraǵasy.
Senat pen máslıhattardyń ózara is-qımylynyń mańyzdy baǵyty – zańdardyń, ulttyq baǵdarlamalar men jobalardy óńirlerde iske asyrý sapasyna monıtorıng júrgizý. Palata tóraǵasynyń pikirinshe, jergilikti jerlerde problemalar anyqtalǵan jaǵdaıda qalalar men aýyldardyń erekshelikterin mindetti túrde eskere otyryp, barlyq deńgeıdegi depýtattardyń belsendi birlesken jumysy qajet bolady. M.Áshimbaev osyǵan baılanysty óńirdiń áleýetin tolyq ashý men depýtattardyń osy baǵyttaǵy kúsh-jigerin biriktirýdiń mańyzdylyǵyn atap ótti.
«Atyraý oblysy shetel ınvestısııalaryn tartý boıynsha elimizde kósh bastap tur. О́nerkásip óniminiń kólemi de dáıekti túrde ulǵaıyp keledi. Aımaqtaǵy shaǵyn jáne orta kásipkerlik sýbektileri sanynyń ósýi de qýantady. Degenmen aımaqta jetistiktermen qosa, sheshimin kútken máseleler de joq emes. Olardyń qatarynda turǵyndardy ekologııa, onyń ishinde aýanyń lastanýy jáne sý máselesi alańdatatynyn bilemiz. Injenerlik jáne energetıkalyq ınfraqurylymdy jańǵyrtý máselesi de ózekti. О́ńirlerdegi máselelerdi sheshýge Senat tarapynan júıeli qoldaý kórsetý – negizgi mindetterdiń biri. Biz óz tarapymyzdan jáne basqa da áriptesterimizben birge oblystyń ózekti máseleleriniń sheshilýine tıisti kómek kórsetetin bolamyz», dedi M.Áshimbaev kezdesýge qatysýshylarǵa arnaǵan sózinde. Ol sondaı-aq «О́ńir» depýtattyq tobynyń jáne máslıhattarmen ózara is-qımyl jónindegi keńestiń aldaǵy otyrystarynyń kún tártibine toqtaldy.
Senatorlar óńirdiń daryndy jastarymen kezdesý barysynda aımaqty odan ári damytý keleshegin, zań shyǵarýdy jetildirý jáne jańa jobalardy iske asyrý jónindegi ıdeıalardy talqylady. Senat tóraǵasy osyǵan baılanysty Qazaqstanda jastardy qoldaý memlekettik saıasattyń basym baǵyty bolyp tabylatynyn atap ótti.
«Qazirgi tańda elimizde ózderińiz sııaqty belsendi, bilikti jastarǵa júıeli túrde qoldaý kórsetilip keledi. Jastardyń sapaly bilim alýyna jaǵdaı jasalyp otyr. Sizderdiń oblystaryńyzda «Atyraý jastary» ıpotekalyq baǵdarlamasy qolǵa alynǵaly 100-ge tarta jas azamat baspanaly bolǵanyn bilemiz. Bul rette Prezıdenttik jastar kadrlyq rezervin aıryqsha atap ótken jón. Májilis jáne máslıhat depýtattarynyń qatarynda jastardyń bolýyn qamtamasyz etetin zańnamalyq normalar da qabyldanǵanyn bilesizder. Senat tarapynan da belsendi jastardy qoldaýǵa arnalǵan jobalar iske asyrylyp keledi. О́skeleń urpaqqa úlken senim men jaýapkershilik júkteletinin aıtqym keledi. Jastarymyzdyń boıyndaǵy sondaı durys ustanymdar memleketimizdiń damýyna tyń serpin beretini sózsiz», dep atap ótti M.Áshimbaev. Ol sonymen qatar Senat janyndaǵy Taldaý mektebi men Jas sarapshylar klýbynyń jumysy týraly aıta kelip, bul jobalar jastardyń áleýetin ashýǵa jáne olardy Palatanyń zań shyǵarý jumysyna tartýǵa baǵyttalǵanyn jetkizdi.
Senat tóraǵasy ulttyq qundylyqtardy odan ári ilgeriletýdiń, úzdiksiz bilim alýdyń jáne kásibı ósý úshin jańa daǵdylardy ıgerýdiń mańyzdylyǵy týraly da aıtty. M.Áshimbaev Atyraý oblysynyń kórnekti tulǵalaryn mysalǵa keltirdi. Olardyń qatarynda Ábý Sársenbaev pen Hıýaz Dospanova, Salyq Zımanov pen Zeınolla Qabdolov, Farıza Ońǵarsynova men Jumeken Nájimedenov bar. Birtýar tulǵalardyń darynymen, erjúrektiligimen jáne ójettiligimen tanymal bolǵanyn atap ótti.
Senat depýtattary sonymen qatar múgedektigi bar balalarǵa arnalǵan «Aına-Like» ortalyǵyndaǵy tárbıelenýshilerimen, «APEC Petro Technic» Joǵary kolledjiniń ujymymen kezdesti, «Kazakhstan Petrochemical Industries Inc.» JShS jumysshylarynyń qyzmetimen jáne eńbek jaǵdaılarymen tanysty. Kezdesýler kezinde óńdeýshi ónerkásipti, ekonomıkanyń jańa salalaryn damytý jáne ınfraqurylymdyq jobalardy iske asyrý máseleleri talqylandy.
