Depýtat N.Sabılıanov Aıagóz qalasynyń turǵyndarymen kezdesti. Jıynda qala turǵyndary ózderiniń kókeıkesti máselelerine toqtaldy. Saılaýshylar áleýmettik turǵyn úılerdiń sapasy, avtobýstardyń keshki mezgilde erte toqtap qalýy, aýyz sý, kóshelerdiń ataýyn ózgertý, qańǵybas ıtterdi atýǵa ruqsat berý, medısınalyq saqtandyrý, gaz tartý, jedel járdem stansasyn Semeıden Aıagózge kóshirý, áýejaı salý syndy áleýmettik máselelerdi kóterdi.
«Birinshiden, turǵyn úımen qamtý óte ózekti. Ekinshi másele – aýyl sharýashylyǵyndaǵy ıgerilmegen jerlerdi qaıtarý. Sondaı-aq eldi mekenderdi joǵary ınternetpen qamtý. Keı aýyldarda ne sý joq, ne qarjynyń ıgerilýiniń esebi joq. Mysaly, Aıagóz qalasynda turǵyn úıler salynǵan, biraq sapasy óte nashar eken. Qysta sýyq, osy másele sheshilse dep otyr. Halyqtyń kótergen máselelerin jazyp aldym, Parlamentke barǵanda kóteriledi. Tıisti zańdarǵa ózgerister engiziledi», dedi depýtat.
N.Sabılıanov saılaýshylardyń barlyq suraǵyna jaýap berdi. Májilis depýtatynyń óńir halqymen kezdesýleri jalǵasyp jatyr.
Abaı oblysy
