Foto: Ýıkıpedııa
Sýretshiniń «Ǵ.Muratbaev», «Abaı», «J.Jabaev», «A.Imanov», «K.Ázirbaev» sııaqty portrettik týyndylary joǵary tanym-talǵamnyń úlgisi. Tarıhı taqyryptaǵy «Túrksib», «Amangeldi sarbazdary», «Qalyńdyq», taǵy basqa kórkem týyndylarynan – epıkalyq aýqymdylyq, ulttyq boıaýdyń aıqyndyǵy kórinedi.
Sýretshi ulttyq dúnıetanym sheńberinde halqymyzdyń turmys-tirshiligin dál beıneleı bildi. Onyń «Kıiz úıdiń ishki kórinisi», «Qyz Jibek», «Qyz uzatý», «Qos qurby», «Kelin túsirý» taǵy basqa shyǵarmalary ulttyq qazynamyzǵa aınaldy.
Qylqalam sheberi mádenıet tarıhynyń, respýblıkalyq qoǵamdyq ómirdiń jylnamasyn jasady. Abaı men Qasteev arasyndaǵy syrly baılanys dúnıeni estetıkalyq-kórkemdik turǵydan tanýdyń, óner ózektestiginiń, rýhanı sabaqtastyqtyń kórinisi. Sýretshiniń súıikti keıipkeri Abaı tulǵasy boldy.
«Abaı kıiz úı aldynda», «Jas Abaı», «Abaı jaz jaılaýda», «Búrkitshi», «Qys», «Jaz», «Kóktem» atty shyǵarmalary arqyly sýretshi Abaı kelbetin ár qyrynan somdady.
«Qazan tóńkerisi», 2 márte «Eńbek Qyzyl Tý», «Qurmet belgisi» ordenderimen marapattalǵan. Shymkent qalasyndaǵy óner ýchılıshesi, QR Memlekettik óner mýzeıi áıgili sýretshiniń esimimen atalady. Ábilhan Qasteevtiń júz jyldyq mereıtoıy IýNESKO kóleminde atap ótildi.
Mádenıet jáne aqparat mınıstrliginiń baspasóz qyzmeti qazaqtyń tuńǵysh kásibı sýretshisine arnalǵan «Ábilhan Qasteev. Ǵasyr murasy» atty kórmeniń saltanatty ashylýy 17 qańtarda saǵat 16.00-de Á.Qasteev atyndaǵy QR memlekettik óner mýzeıinde ótetinin habarlady. Ekspozısııa kórnekti qazaq sýretshisiniń shyǵarmashylyǵynyń qalyptasýy týraly baıandaıdy. Ekspozısııaǵa HH ǵasyrdyń eń mańyzdy tarıhı kezeńderin beıneleıtin 300-den astam kórkem jáne grafıkalyq týyndylar qoıylady.
