Atap aıtqanda, budan bylaı Pavlodar qalasynyń irgesindegi Lenın kenti – Atameken, Jelezın aýdanyndaǵy Ozernoe aýyldyq okrýgi – Maıly, Tereńkól aýdanyndaǵy Bobrovka aýyldyq okrýgi – Jańabet, Fedorovka okrýgi – Tomarly, Vernenka okrýgi – Altaı, Lvovka – Altaı, Voskresenka – Áýlıeaǵash, Berezovka aýyly Aqqaıyń dep atalady. Al Trofımovka aýyly Qorjynkól degen ádemi ataýdy ıelenbek.
Atap ótýge turarlyq jaıt, erterekte Jetinshi aýyl, odan soń uzaq jyldar «Lenınskıı» dep atanǵan kent oblys ortalyǵy úshin geografııalyq turǵydan asa mańyzǵa ıe. Kent retinde negizi 1914 jyly qalanyp, Bıdaıyq dep atalatyn jerde №7 aýyl qurylady. Al 1965 jyly proletarıat kóseminiń aty berildi. Keńes zamanynan Pavlodar qalasyna qaraıtyn kentke táýelsizdik jyldary aýyldardan kóp otbasylar kóship keldi. Sońǵy 30 jylda halyq sany ósip, qazaqtyń da qatary artty. Statıstıkalyq derekterge súıensek, búginde munda 10 050 adam turady. Onyń teń jartysy – ózimizdiń qandastarymyz. Jalpy, kent kópultty bolǵandyqtan ba, onyń ataýyn ózgertý máselesi kópke deıin jergilikti qaýym tarapynan qarsylyqqa ushyraı berdi. Aýyl aqsaqaldary men bas kóterer azamattary birneshe márte Qazanǵap bıdiń atyn bergisi kelip, usynys jasaǵanymen halqymyzdyń ótken tarıhyn onsha-munsha bilmeıtin jergilikti jurt bul bastamadan úzildi-kesildi bas tartty. Áıtpese, HIH ǵasyrda ómir súrgen orta júzdiń begili bıi, Baıanaýyl syrtqy okrýginiń aǵa sultany bolǵan Qazanǵap Satybaldyulynyń ómir joly bul ólkemen tyǵyz baılanysty. Zıraty da aýyldan alys emes. Ideologııalyq turǵydan ábden eskirgen «Lenınskıı» ataýyn kartadan syzyp tastaýǵa talpynǵan qoǵam belsendileri bul joly kentke 6 túrli nusqa usyndy. Olar – Qazanǵap, Bıdaıyq, Atameken, Yntymaq, Qazyna jáne Jetinshi aýyl. Qorytyndy jıynda Qazanǵap bı men Atameken ataýlary qalyp, jergilikti qaýymdastyqtyń 50 múshesiniń 49-y «Atamekenge» daýys berdi.
Pavlodar oblysy
