Infografıkany jasaǵan – Záýresh SMAǴUL, «EQ»
Eńbek jáne halyqty áleýmettik qorǵaý mınıstriniń buıryǵymen qandastar men qonys aýdarýshylardy qabyldaýǵa arnalǵan 2024 jylǵy óńirlik kvotasy 9 483 adam dep belgilendi. Bul 2023 jylmen salystyrǵanda 554 adamǵa artyq.
«Buıryqtyń maqsaty – Úkimet aıqyndaıtyn óńirlerde qandastar men ishki qonys aýdarýshylardy ońtaıly qonystandyrý. 2024 jyly óńirlik kvota oblystar boıynsha qandastarǵa Pavlodar oblysy – 902, Qostanaı oblysy – 550, Aqmola oblysy – 285, Shyǵys Qazaqstan oblysy – 269, Soltústik Qazaqstan oblysy – 207, Abaı oblysy – 220 adamǵa, al ishki qonys aýdarýshylarǵa Soltústik Qazaqstan oblysy – 2 702, Pavlodar oblysy – 2 603, Qostanaı oblysy – 950, Shyǵys Qazaqstan oblysy – 372, Abaı oblysy – 255, Ulytaý oblysy – 132, Qaraǵandy oblysy 36 adamǵa beriledi», delingen mınıstrlik habarlamasynda.
Buǵan qosa, qandastar men qonys aýdarýshylardy qabyldaýǵa arnalǵan óńirlik kvota alatyn adamdarǵa memlekettik qoldaý sharalary kórsetiledi. Atap aıtqanda, kóship-qonýy úshin otbasynyń árbir múshesine 70 AEK birjolǵy sýbsıdııa berilse, 12 aı ishinde bir otbasyna 15-ten 30 AEK-ke deıin tólenetin turǵyn úıdi jaldaý jáne kommýnaldyq qyzmetterge aqy tóleý boıynsha shyǵystardy jabýǵa sýbsıdııa beriledi. Sonymen qatar qysqamerzimdi kásiptik oqytýǵa joldama, jumysqa ornalasýǵa nemese kásipkerlik bastamany damytýǵa járdemdesý, turǵyn úı satyp alýǵa ekonomıkalyq mobıldilik sertıfıkattaryn berý qarastyrylǵan.
Resmı derek boıynsha, 1991 jyldan bastap 2024 jylǵy 1 qańtar aralyǵynda 1 mln 128,37 myń qazaq tarıhı otanyna oralǵan. 2023 jyly 21,3 myń qazaq atajurtqa kelip, qandas mártebesin alypty.
