«Ekibastuz jylý-energo» JShS-da 2022 jyldyń qarasha aıynyń sońynda bolǵan apattan soń bıyl qysta stansa qalany taǵy tońdyryp almaı ma degen ótkir másele týyndaǵany ras. Deıturǵanmen ótken jylý maýsymy toqtaǵan sátten bastap stansa men qala ishindegi jylý júıelerinde keń aýqymdy jóndeý jumystary qolǵa alyndy. Stansanyń ózinde negizgi 10 jabdyǵy, atap aıtqanda, 8 qazandyq kúrdeli jóndeýden ótse, taǵy ekeýine aǵymdaǵy jóndeý júrgizildi.
– Qazirgi ýaqytta qazandyq agregattarynan shyǵatyn jylý tasymaldaǵyshtardyń temperatýrasy normaǵa saı. Stansa tolyq júktememen jumys istep, qajetti parametrlerge shyqty. Ortalyqtyń qoımalarynda 48 myń tonna kómir men 300 tonna mazýt bar. Bul kólem normatıvti qordaǵydan joǵary, – deıdi óńirlik energetıka jáne turǵyn úı-kommýnaldyq sharýashylyq basqarmasy basshysynyń mindetin atqarýshy Kúlbarshyn Arynova.
Aıtyp óteıik, byltyr jeltoqsan aıynda Arqaǵa kelip jetken alǵashqy aıazda Ekibastuzdyń jylý-energııa ortalyǵy syr berdi. Kásiporyndaǵy sý jylytý agregattaryndaǵy kúldi shaıýǵa arnalǵan sý qubyryna zaqym kelip, ekinshi sehtaǵy bager sorǵysy sý astynda qalǵan. Saldarynan jylý parametrleri tómendep, shahar halqy úıleriniń salqyndap ketkenine shaǵymdanǵan edi. Ol kemshilikterdiń barlyǵy joıylǵan. Stansa basshylyǵy aldaǵy aıazdy kúnderge shydas beremiz dep otyr.
Byltyr Ekibastuz boıynsha jalpy uzyndyǵy 50 271 metr jylý qubyrynyń oqshaýlaǵyshtary qalpyna keltirilgen. Bul is-sharany kásiporyn qyzmetkerleri áli de jalǵastyryp jatyr. Qańtar aıynyń basynan jalpy uzyndyǵy 413 metr qubyr arnaıy materıaldarmen qaptalǵan.
Pavlodar oblysy,
Ekibastuz qalasy
