Foto: QR Oqý-aǵartý mınıstrligi
Dóńgelek ústelge qatysýshylar balalar ádebıetin damytýdyń ózekti máselelerin talqylap, qazaq tilindegi kontenttiń sapasyn arttyrý jáne ony óńirlik bilim basqarmalarymen, kitaphanalarmen, ata-analar uıymdarymen, sondaı-aq iri eńbek ujymdarymen birlese jumys isteý joldaryn qarastyrdy.
Oqý-aǵartý mınıstri mektepterde balalar basylymdaryn ilgeriletý boıynsha keshendi baǵdarlama ázirlenetinin alǵa tartty.
«Memleket basshysynyń tapsyrmasy boıynsha «Balalar kitaphanasynyń» jańa modeli qurylyp jatyr. Bıylǵy oqý jylynda belsendi oqyrmandardy 100 kórkem, ǵylymı-tanymdyq kitap oqýǵa yntalandyrý, elektrondy kitaphanalar men onlaın-resýrstar qurý, gazetter men jýrnaldardy oqý mádenıetin arttyrý boıynsha is-sharalar bastaldy. Bul baǵyttaǵy jumys «Birtutas tárbıe baǵdarlamasy» aıasynda da júrgizilip jatyr. Qazir biz mektep kitaphanashylarynyń mártebesi men jalaqysyn kóterý máselesin qarastyryp jatyrmyz», dep atap ótti Ǵanı Beısembaev.
Oqý-aǵartý mınıstri balalarǵa arnalǵan basylym ujymdarynyń jumysyn joǵary baǵalap, alǵys hattarmen marapattady. Olardyń qatarynda «Ulan», «Drýjnye rebıata», «Qazaqstan dáýiri» gazetteri, sondaı-aq «Aq Jelken», «Baldyrǵan», «Aqyldym», «Jeti Álem», «Móldir bulaq», «Aıgólek» jáne basqa da jýrnaldar boldy.
Kezdesý qorytyndysy boıynsha balalar men jastarǵa arnalǵan týyndy shyǵaratyn shyǵarmashylyq zııaly qaýymdy, kreatıvti ındýstrııa sheńberinde balalar basylymdarynyń jobalaryn qoldaý jónindegi sharalar keshenin uıymdastyrý, «Birtutas tárbıe baǵdarlamasy» sheńberinde jeke taqyryptyq seksııa ótkizý týraly sheshim qabyldandy.
