Sýretti túsirgen – Erlan OMAR, «EQ»
«Qazaq gazetteri» seriktestigi men L.N.Gýmılev atyndaǵy Eýrazııa ulttyq ýnıversıteti memorandým jasasyp, birneshe jyldan beri mańyzdy qujat aıasynda tize qosyp, birlesken ıgi isti júzege asyryp keledi. Igilikti yntymaqtastyqtyń kórinisi retinde ýnıversıtet stýdentteri tájirıbelik sabaqty bastap ketti. Alǵashqy sabaqtyń basqosýynda «Qazaq gazetteri» JShS-nyń bas dırektory Dıhan Qamzabekuly buqaralyq aqparat quraldarynyń jańǵyryp, jańa kezeńge ótý úderisi júrip jatqanyn aıtty.
Stýdentter qara shańyraqta úlken synnan ótip, mol tájirıbe jınaıtynyn, jýrnalıst qoǵam aǵymyna oraı, talabyna saı tushymdy dúnıe usyna alýǵa tıis ekenin jetkizdi. Bolashaq jýrnalıster gazet redaksııasyndaǵy bilikti, bilgir tájirıbeli mamandardyń qaıraýy men shyńdaýynan ótip, ysylýy qajettigin eskertti.
Jýrnalıstıka jáne saıasattaný fakýltetiniń dekany Qaırat Saq gazet redaksııasymen ýnıversıtette fakýltet qurylǵan kezden bastap áriptestik baılanys ornatylǵandyqtan ekijaqty memorandým aıasynda birlesken ıgi is aldaǵy ýaqytta da jalǵasyn tabatynyn jetkizdi. Qaırat Saq keıingi jyldary Eýrazııa ýnıversıtetiniń Jýrnalıstıka jáne saıasattaný fakýltetinde oqýǵa yntaly stýdentterdiń qatary artyp kele jatqanyn aıtty. 105 jyldyq tarıhy bar basylym, qazaq jýrnalıstıkasynyń ustahanasyna aınalǵan redaksııada stýdentterdiń tájirıbesin shyńdaýyna óris ashqan ujym basshylyǵyna alǵysyn bildirdi.
«Qazaq gazetteri» seriktestigi bas dırektorynyń orynbasary Qambar Ahmet teorııany praktıkamen ushtastyrýdyń tıimdiligin aıta kele, búgingi bastama talapker jastardyń shyńdalýyna jan-jaqty múmkindik beretinine toqtaldy. Buǵan deıin osyndaı dáristerge qatysqan EUÝ-dyń birneshe túlegi búginde el gazetinde eńbek etip júrgenin atap ótti.
Jýrnalıstıka jáne saıasattaný fakýlteti, Baspasóz jáne baspa isi kafedrasynyń meńgerýshisi Amangeldi Shúrentaev stýdentterdiń redaksııada tájirıbeden ótýi, eń aldymen, ózderiniń áleýetin tanytýyna zor múmkindik ekenin aıtty.
«Qazirgi medıanyń menedjmenti jáne marketıngi» atty praktıkalyq sabaqtyń alǵashqy dárisin «Egemen Qazaqstan» gazetiniń Internet redaksııa jetekshisi Qýat Áýesbaı ótkizdi.
