«Egemen Qazaqstan» gazetinde buǵan deıin jazylǵandaı, Pavlodar oblysynyń Maıqaıyń kentindegi «Shanhaı» shaǵyn aýdanynyń turǵyndary ár kúnin úreımen ótkizip keledi. Altyn kenishi halyq turyp jatqan baspanalardan 300-400 metrdeı jerde ornalasqan. Jurttyń «kenishte jer jarý jumystary júrgizilgende, úıimiz jerastyna opyrylyp túsip ketip, bala-shaǵamyzben opat bolamyz ba» degen qorqynyshyn jetkizgen edik.
Májilistiń keshegi plenarlyq otyrysynda depýtat Jarqynbek Amantaıuly máseleni ashyq jetkizip: «Jyl basynda Pavlodar oblysynyń Baıanaýyl aýdanyndaǵy «Maıqaıyńaltyn» aksıonerlik qoǵamy aýmaǵynda bolǵan apat qabyrǵamyzdy qaıystyrdy. Eń ókinishtisi, qulaǵan jerdiń astynda buryndary shahta bolǵanyn eshkim eskertpegen. Tipti ústinen jol salǵan jáne sol joldy qyzmetkerler osy kúnge deıin paıdalanyp kelgen», dep apatqa sebep bolýy múmkin negizgi problemalardy atap ótti.
Kenttegi «Shanhaı» atanyp ketken shaǵyn aýdan turǵyndarynyń alańdaýshylyǵy údep keledi dedi depýtat. «Shaǵyn aýdannyń asty da shahtaǵa aınalyp ketken deıdi. Ken qazý barysyndaǵy jarylystardan úı irgesi solqyldap ketetinin aıtyp otyr. 100-ge jýyq shańyraq ornalasqan aýmaq, qazirgi opyrylyp qulaǵan jerden nebári 500 metr qashyqtyqta ornalasqan. Búginde 10 myńǵa jýyq halyq turatyn eldi mekenniń negizgi tirshilik kózi de osy ken oryndary. Tek «Maıqaıyńaltynda» myńnan astam jergilikti turǵyn eńbek etedi. Kásiporynnyń resmı saıtyndaǵy málimetterge súıensek, kásiporyn qurylǵan ýaqyttan beri munda 16,7 mln tonna ken óndirilgen. Bul degenimiz – 80 tonna altyn, 1240 tonna kúmis, 204 myń tonna mys, 300 myń tonna myrysh. 13 mln tonnadan astam ken kásiporynǵa qarasty ken baıytý fabrıkasynda qaıta óńdelgen. Sóıte tura, aksıonerlik qoǵam óz qarjysyna kentte eshqashan turǵyn úı salmaǵan, balalar alańy, sporttyq nemese áleýmettik nysandar turǵyzbaǵan. Tek jylyna jergilikti bıýdjetke bardy-joqty alym-salyq tólep kelgen. Al endi osy aksıonerlik qoǵamnyń 100 paıyz aksııasy Kıpr Respýblıkasynda ornalasqan «Rence Enterprises LTD» kompanııasyna tıesili. Ol kompanııa Mılan Popovıch degen bıznesmenge tıesili. Elimizdiń baılyǵyna kenelgen bul baı-patshalardyń isin kim qadaǵalaýǵa alady?» dep qynjyla saýal tastady Jarqynbek Amantaıuly.
Sóz sońynda depýtat Úkimetke bes tarmaqtan turatyn depýtattyq saýal joldady. Birinshiden, arnaıy qurylǵan komıssııanyń jumysyn ashyq ári jurtshylyqpen, jergilikti turǵyndarmen birlese otyryp úılestirý kerek. Ekinshiden, atalǵan jerdegi barlyq shahtalyq jumys júrgizilgen aýmaqtardy anyqtap, olardy qaýipsizdik erejelerine saı oqshaýlaý kerek. Úshinshiden, shaǵyn aýdannyń turǵyndaryna barlyq qaýipsizdik jaǵdaıyn qarastyrý shart. Qajet bolsa kóshirýdi qarastyrý kerek. Tórtinshiden, elimizdiń baılyǵyn paıdalanyp, biraq áleýmettik kómekti der kezinde kórsetpeı otyrǵan barlyq sheteldik kompanııalarǵa zań júzinde qatań sharalar qoldanylýy qajet. Besinshiden, oryn alǵan apatqa jáne tehnıkalyq qaýipsizdiktiń saqtalmaýyna túrtki bolǵan jaǵdaıǵa prokýratýra ádiletti baǵasyn berýi qajet.
Pavlodar oblysy,
Baıanaýyl aýdany,
Maıqaıyń kenti
