«QazTransGazAımaq» AQ oblystyq fılıalynyń ókilderi «Qostanaı aýdanynda gaz taratý stansııasy salynyp jatyr. Sol toraptyń qurylysy aıaqtalǵan soń, ýaqytsha shekteý de birjola alynyp tastalýy múmkin. Ol jergilikti ákimdikke baılanysty», degen.
Kópshilik zaryǵyp kútken torap taıaýda ǵana iske qosyldy. Quny – 3,3 mlrd teńge, jumysy tolyq avtomattandyrylǵan, saǵatyna 150 myń tekshe metr gaz ótkize alatyn mundaı qýatty stansanyń óńirde birinshi ret salynyp otyrǵanyn da aıta ketken jón. AGTS-tiń jumysymen tanysýǵa barǵan oblys ákimi Qumar Aqsaqalov jańa torap keleshekte Tobyl qalasynda salynatyn «Astana» men «Báıterek» shaǵyn aýdandaryna ǵana gaz taratatynyn aıtty. Atalǵan shaǵyn aýdandarda kópqabatty 150 turǵyn úı turǵyzý josparlanǵan. Oǵan keleshekte shamamen 60 myńdaı adam qonystanbaq. «Bıyl alǵashqy 24 úıdiń qurylysyn bastaý josparlanyp otyr. Sondaı-aq birtindep jańa mektepter, balabaqshalar, perzenthana jáne basqa da áleýmettik nysandar salyna bastaıdy. Jańa gaz taratý toraby atalǵan shaǵyn aýdandardy gazben qamtamasyz etýge tolyq múmkindik beredi. Keleshekte óńirge kógildir otyn kóbirek bólinip, osy eki shaǵyn aýdannan artylyp jatsa, biz Qostanaı, Altynsarın aýdandaryna da tabıǵı gaz bere alamyz», dedi ákim.
Qostanaı aýdanynyń ákimi Berik Tańjaryqovtyń aıtýynsha, josparlanǵan shaǵyn aýdandarda áli úı salynbaǵandyqtan, qazir atalǵan stansany iske qosýdyń máni joq.
«Biz bul joly stansanyń jumysyn tekserip kórý úshin arnaıy qosyp kórdik. О́ıtkeni buǵan deıin toraptyń gaz qubyryn ashyp-jabatyn bóliginde aqaý bolǵan. Ol aqaý joıyldy. Qazir stansa jaqsy jumys istep tur. Biraq gaz jetkizetin qubyrlardyń kómeıi jabyq. Ony jańa shaǵyn aýdandardaǵy turǵyn úıler salynyp bolǵan soń ashamyz», dedi aýdan ákimi.
Jańa iske qosylǵan avtomatty torap, ókinishke qaraı, gazsyz otyrǵan Qostanaı qalasy turǵyndarynyń máselesin sheship bere almaıtyn boldy.
«150 myń tekshe metr gaz 2021 jylǵa deıin bólinip qoıǵan. Onyń ústine, osydan 60 jyl buryn salynǵan qubyrlar ábden tozyp bitken. Tolyq kólemde gaz taratý úshin gaz qubyrlaryn jańartý kerek. Eki jyldan beri osy baǵytta jumys júrgizip jatyrmyz. Onyń ústine, biz Aqtóbeden Qostanaıǵa deıin jańa gaz qubyryn salýdy josparlap otyrmyz. Basty mindet – oblysqa mol gaz qoryn jetkizý jáne jańa kásiporyndar salý. Qazir jobalyq-smetalyq qujattardy ázirleý, qarjy kózderin qarastyrý jumystary júrgizilip jatyr. Sondyqtan moratorıı, qazirshe óz kúshinde turady. Ony joıý aldaǵy ýaqyttyń enshisinde. Keleshekten úmit kútemiz», dedi Q.Aqsaqalov.
Byltyr aqpan aıynda óńirge jumys saparymen kelgen Energetıka vıse-mınıstri Jandos Nurmaǵanbetov oblystaǵy gaz tapshylyǵy máselesin kóterip, óńirdi gazdandyrý deńgeıi 58,3 paıyzǵa jetkenin, oblystyń 485 myń turǵyny tabıǵı gaz tutynyp otyrǵanyn aıtqan. Oblys turǵyndarymen kezdesken vıse-mınıstr kópshilikke gaz salasyn damytýdyń 2026 jylǵa deıingi keshendi jospary qabyldanǵanyn, ol gazdyń resýrstyq bazasyn ulǵaıtý, gazǵa baǵa belgileýdi reformalaý jáne azamattardyń áleýmettik osal sanattary úshin gaz baǵasyn tejeý jónindegi sharalardy kózdeıtinin aıtqan.
«QazTransGazAımaq» AQ oblystyq fılıalynyń málimetinshe, 2021 jyldan beri qaraıǵy ýaqyt ishinde óńirde shamamen 10 myńdaı turǵyn gaz qubyryna qosylý týraly ótinish bergen. Biraq ol ótinishterdi qanaǵattandyrýǵa moratorıı múmkindik bermeı tur.
Qostanaı oblysy
