Prezıdent suhbatynda ishki jáne syrtqy saıasattyń, sondaı-aq áleýmettik-ekonomıkalyq saıasattyń basymdyqtary egjeı-tegjeı baıandaldy. Ásirese maqalada áleýmettik-ekonomıkalyq jáne qoǵamdyq-saıası reformalardy zańnamalyq qamtamasyz etý basty orynǵa qoıyldy. Basty qyzmeti depýtattarǵa zań shyǵarý bastamasyn iske asyrý, zań jobasyn ázirleý, zańnamalyq tıimdiligin taldaýǵa kómek kórsetýge baǵyttalǵan Parlamentarızm ınstıtýty búginde Memleket basshysynyń reformalaryn quqyqtyq qamtamasyz etýge kóńil bólip otyr. Jıynnyń maqsaty da sol – osy saladaǵy ázirlemeler men zertteýlerdiń nátıjelerin saralap, ortaq oı-pikirlerdi talqylaý.
Dóńgelek ústel jumysyn ashqan Parlamentarızm ınstıtýtynyń dırektory Qanatbek Safınov jıynnyń mańyzdylyǵyna toqtaldy. «Basqosýmyz Memleket basshysy Qasym-Jomart Toqaev bastamashylyq etken quqyqtyq reformalardy is júzinde iske asyrýǵa arnalyp otyr. Búgin aıtylǵan saraptamalyq taldaýlar men ortaq oı-usynystar asa qajet. Sebebi Prezıdenttiń «Egemen Qazaqstan» gazetine bergen suhbatynda aıtylǵan tezıster zań shyǵarý úderisiniń negizi bolýǵa tıis», dedi ol.
Parlament Májilisiniń Agrarlyq máseleler jónindegi komıtetiniń tóraǵasy, «Aýyl» partııasynyń tóraǵasy Serik Egizbaev Prezıdenttiń suhbatyn «Memleket pen qoǵamnyń damý vektorlary kórsetilgen baǵdarlamalyq maqala» dep atady. Osylaı degen ol belgili bir problemalar baıqalatyn eldiń agrarlyq sektoryn damytýǵa toqtalý qajettigin jetkizdi. Mysaly, «Aýyl» partııasy basshysynyń aıtýynsha, eldiń IJО́-de aýyl sharýashylyǵynyń úlesi nebári 4,2 paıyzdy quraıdy. Depýtat ımporttalǵan jemis-jıdek kókónisteriniń jergilikti naryqtaǵy ústemdigine de qynjylys bildirdi. Saldarynan olar básekelestikke tótep bere almady jáne eldiń ońtústigindegi jylyjaı sharýashylyqtary jabyldy. Onyń aıtýynsha, Úkimettiń sharýalar aldynda sýbsıdııalar boıynsha 155 mıllıard teńgege bereshegi bar. Jınaqtalǵan problemalardy sheshý úshin Parlament depýtattary, atap aıtqanda, «Aýyl» partııasynyń fraksııasy «Otbasy bankine» uqsas Agrobank týraly zań jobasyna bastamashylyq jasaıdy. Bul shara agrarlyq sektordy kredıtteýdi jaqsartatynyn atap ótip: «Prezıdent Q.Toqaev qyrkúıek aıynda 2029 jylǵa qaraı eldiń IJО́-ni eki esege arttyrý týraly mindet qoıdy. 2023 jyldyń qorytyndysy boıynsha álemdegi kúrdeli geosaıası jaǵdaıǵa qaramastan, ekonomıkamyz damýdyń oń úrdisin saqtap otyr. Byltyr IJО́ 4,9 paıyzǵa ósti. Naqty mánde bul – 75,5 trıllıon teńge. Ekonomıkanyń ósýin odan ári kórsetý úshin ýaqtyly qabyldanǵan zańdar qajet. Bul oraıda Parlament pen Úkimet birlesip jumys istep jatyr», dedi depýtat.
Al Májilis depýtaty Murat Ábenov Memleket basshysynyń suhbatynda kórsetilgen saıası reformalardyń mańyzdy qorytyndylaryna toqtaldy. «Qoǵamda saıası reformalardyń qanshalyqty tıimdi ekendigi jáne odan ári ózgerister bola ma?» degen suraqtar burynnan pisip jetilgen. Prezıdent suhbatynda osy suraqtarǵa jaýap berdi. Árıne, reformalar tez bolmaıdy. Degenmen búgin biz reformalardyń iske asyrylyp jatqanyn kórip otyrmyz. Mysaly, Parlament, máslıhattar, ákimder depýtattaryn saılaý júıesi jaqsardy, Parlament pen Esep beretin úkimettiń róli kúsheıtildi», dedi depýtat. Alaıda zańnamalyq jumysty odan ári jaqsartý jumystary alǵa basýǵa tıis. Bul úshin Parlamentte analıtıkalyq zertteýler júrgizý, mamandardy tartý jáne tájirıbe almasý úshin arnaıy alańdar qurý mańyzdy bolyp otyr.
«Barlyq pikirtalas kóshede emes, Parlamentte ótýi kerek. Parlament barlyq damyǵan elderdegideı jurtshylyqtyń pikirin jetkizý jáne eń tıimdi sheshimder qabyldaý quraly bolýǵa tıis», dep qorytyndylady sózin depýtat.
Qabyldanatyn zańdardy qoǵam ózi talqylaýǵa tıis. Áıtpese, ózgere beretin zańdar ómirsheń bolmaıdy. Bul oraıda Parlamentarızm ınstıtýtynyń sarapshylary qoǵam, jalpy el úshin bolashaq zańnamalyq aktiler muqııat oılastyrý qajettigin atap ótti. Sóz sońynda Prezıdenttik ortalyq dırektorynyń orynbasary Serik Sydyqov ortalyq otandyq jáne sheteldik sarapshylar úshin eldiń saıası jáne áleýmettik-ekonomıkalyq ómiriniń ózekti máselelerin talqylaıtyn turaqty dıalog alańyna aınalatynyna senim bildirdi.
