Foto: ru.qaz365.kz
«Suraýy bar» ıýtýb arnasyna suhbat bergen Jánibek – Eddı Jannyń Qazaqstandaǵy zańdy ókili Qymbat Dosjan 22 jastaǵy Belgııa azamaty tek anasyn ǵana emes, týǵan jerin, qara orman halqyn da izdep kelgenin aıtty.
«Ol Ispanııanyń Maıorka aralynan Qazaqstanǵa kelý úshin alty aı boıy aqshasyn jınaǵan. Dýbaı arqyly ushyp keldi. Sonda Dýbaıdyń áýejaıynda ózine uqsaıtyndardy kórip eńkildep jylapty. Muny ózi aıtyp otyr. Dýbaıdan qaıtqan qazaqtardy alǵash kórgende egilip sala bergen. 22 jyl shemen bolyp qatyp qalǵan shermende saǵynysh ońaı ma! О́ıtkeni ol Eýropadan dál mundaı kóp qazaqty kórgen joq. Jánibek qazir Taılandta tynyǵyp júr, az kúnde Ispanııaǵa qaıtady. Negizgi jumysy – týrıstermen baılanys ornatyp, serfıng úıretedi. Qoly qalt etse, atqa minip seıildegendi, jylqy janýaryn baptaǵandy qalaıdy eken, qanynda bar ǵoı», dedi Qymbat Dosjan.
Jýrnalıst suhbatynda Jánibek – Eddı Jannyń anasyn izdep kelýi soǵylǵan úlken qońyraýdyń tek syńǵyry ǵana ekenin aıtty.
