Jańa zaýyt jobasyna qol qoıyldy

«Aqtaý teńiz porty» arnaıy ekonomıkalyq aımaǵynyń aýmaǵynda salynyp, osy jyldyń sońyna taman paıdalanýǵa berýdi kózdep otyrǵan «Mańǵystaý oblysynda jylýmen jabdyqtaý, ystyq sýmen jabdyqtaý jáne ónerkásip úshin ıkemdi polımerli aldyn ala oqshaýlanǵan qubyr­lar shyǵaratyn zaýyt salý» jobasy aıasynda «Eýropalyq qubyr júıeleri» JShQ Mańǵystaý oblysynyń ákimdigimen yntymaqtastyq týraly memorandýmǵa qol qoıdy.

– «Aqtaý teńiz porty» AEA aýmaǵynda ón­diristi oqshaýlaý birneshe ózekti mindetterdi sheshýge kómektesedi. Ekonomıkalyq turǵyda bul bizge ımportty otandyq ónimmen aýystyrýǵa múmkindik beredi. Sondaı-aq biz sheteldik kompanııalardan ónimdi satyp alýdan góri ózimiz óndirýge jáne qaıta óńdeýge kóshemiz. Jańa joba óńirlik damýǵa úles qosyp, sala úshin kadrlar daıarlaý múmkindigin ashady. Basty artyqshylyqtyń biri – jańa jumys oryndaryn qurý. Bolashaq kásipornymyz 50 turaqty jumys ornyn ashýǵa nıetti. О́ndiristi oqshaýlaý jergilikti shaǵyn jáne orta bıznes úshin mýltıplıkatıvti jáne qosymsha paıda ákeledi dep úmittenemiz. Bul – jergilikti bıznes úshin naqty perspektıva, – degen Dırektorlar keńesiniń múshesi – «Eýropalyq qubyr júıeleri» JShQ kommersııalyq dırektory A.Arýtıýnov jobaǵa ınvestısııa salýǵa daıyn ekenderin jetkizdi. Jobany júzege asyrý úshin «Eýropalyq qubyr júıeleri» JShQ bastapqy kezeńde 5 mıllıon dollar qarajat bólýdi qaras­tyryp otyr.

Dástúrli bolat qubyrlarmen salystyrǵanda kem degende 50 jyldyq uzaqmerzimdi kepildik jáne salqyn­datqyshtyń gıdravlıkalyq ótkizgishtiginiń jaq­sarýy, absolıýtti kedir-budyrlyqtyń tómen­di­gi, sondaı-aq bitelý men shógindilerdiń jınalý qaýpiniń bolmaýy sııaqty sıpattamalary bul ónimge basymdyq beredi. Zaýyttyń óndiristik qýaty jylyna keminde 200 km qubyr ónimin quraıdy. Joba avtorlarynyń sózine sensek, jańa tehnologııalardy qoldaný kezindegi jylý jelileri men ystyq sýmen jabdyqtaýdyń shyǵyndaryn bolat qubyrlaryn salýǵa ketetin shyǵyndarmen salystyrýǵa bolady. Uzaqmerzimdi perspektıvada qoldanylatyn qubyrlar apattyq rejimderdiń jáne qubyrlardyń jarylýyna baılanysty oqıǵalardyń bolmaýy esebinen paıdalaný shy­ǵyn­daryn barynsha azaıtýǵa múmkindik beredi, bul qala jáne óńir turǵyndary úshin jylý ener­gııa­synyń tarıfterine paıdaly áser etedi eken.

– Tehnologııanyń ereksheligin eskere oty­­ryp, joǵary sapaly ónim óndirýmen aınalysatyn zaýyt belgilengen merzimde paı­dalanýǵa berilýge tıis. Mańǵystaý oblysynyń ákimdigi qoldanystaǵy zańnama sheńberinde jer ýchaskesin berý, «Aqtaý teńiz porty» arnaıy ekonomıkalyq aımaǵynyń aýmaǵynda qajetti ınjenerlik kommýnıkasııalardy júrgizý úde­ri­sine járdemdesýdi qosa alǵanda, áleýetti ınvestorǵa jan-jaqty qoldaý kórsetýge da­ıyn. Jobany iske asyrý Aqtaý qalasynyń tur­ǵyndaryn sapaly jylý energııasymen jáne ystyq sýmen qamtamasyz etýge, energııa tıim­diligi men energııa únemdeýdi arttyra oty­ryp, energııa shyǵyndaryn tómendetýge ba­ǵyt­­talǵan, – dedi Mańǵystaý oblysynyń ákimi N.Noǵaev.         

Mańǵystaýda ekijaqty jobalarǵa talaı qol qoıylyp qýantqan, biraq búginde otandyq ónimdi kól-kósir óndirip jatqandary shamaly. Bul joba da joǵalyp kete me, joq álde ónimdi kásiporyn bola ma, ol jaǵyn ýaqyt kórsetedi.

Mańǵystaý oblysy