Alqaly jıyndy ashqan quqyq qorǵaý vedomstvosynyń basshysy polısııa general-leıtenanty Erjan Sádenov keshe ǵana Ishki ister mınıstrliginiń alqasynda el Prezıdenti-Qarýly Kúshterdiń Joǵarǵy Bas qolbasshysy Qasym-Jomart Toqaev Ulttyq ulannyń qyzmetine joǵary baǵa bergenin atap ótti.
«Sonymen qatar men quqyqtyq tártip áskerlerimen baılanysty problemalyq máselelerdi belgiledim. Atap aıtqanda, ofıserler men serjanttar quramynyń jetispeýshiligi jaıly másele qozǵaldy. Búginde jaýyngerlik qyzmet atqaratyn áskerı qyzmetshilerdiń laýazymdaryn tolyqtyrý máseleleri ózekti bolyp otyr.
Árbir komandır bólimshelerdiń qyzmettik-jaýyngerlik áreketin qamtamasyz etý úshin bilikti kadrlardy irikteýmen aınalysýǵa tıis. Bas shtabqa, qolbasshylarǵa, áskerı bólimderdiń komandırlerine bos laýazymdardy shuǵyl túrde jasaqtaýdy tapsyramyn. Jeke quram úshin qyzmetke qajetti jaǵdaılardy jasap, qoǵamda qyzmettiń tartymdylyǵyn arttyrý kerek. Jergilikti atqarýshy organdarmen, qorǵanys isteri jónindegi bólimshelermen birlesip osy baǵyttaǵy jumysty jandandyrý qajet», dedi IIM basshysy.
Al óz kezeginde Ishki ister mınıstriniń orynbasary – Ulttyq ulannyń Bas qolbasshysy general-leıtenant Erkin Botaqanov Memleket basshysynyń III Búkilarmııalyq keńeste bergen tapsyrmalary boıynsha Ulttyq ulanda atqarylǵan aýqymdy jumystar jaıly málimdedi.
Otyrys barysynda Ulttyq ulan Bas qolbasshysynyń birinshi orynbasary – Bas shtab bastyǵy general-maıor Qaırat Aqtanov ótken jylǵy áskerlerdiń qyzmettik-jaýyngerlik jumysy týraly qorytyndy baıandama jasady.
Osy oraıda áskerdiń jedel qoldanýǵa daıyndyǵyn arttyrý maqsatynda áskerı qyzmetshiler eki júzden astam birlesken oqý-jattyǵýlaryna qatysqan. Onyń ishinde vedomstvoaralyq toptar quramyndaǵy daǵdarys jaǵdaılaryna den qoıý jónindegi keshendi oqý-jattyǵýlar da bar.
Quqyqtyq tártip áskerleriniń bólimsheleri ózara is-qımyl jasaıtyn organdarmen birlesip qoǵamdyq tártipti qorǵaýdy kúsheıtýge, tabıǵı sıpattaǵy tótenshe jaǵdaılardyń saldaryn joıýǵa jáne izdeý is-sharalaryna da atsalysqan.
Mindetterdiń aýqymdy bóligin áskerı bólimsheler qoǵamdyq tártipti qorǵaýǵa jáne eldegi jedel jaǵdaıdyń ózgerýine baılanysty atqarǵan. Onyń ishinde mańyzdy qoǵamdyq-saıası is-sharalardy ótkizý kezeńine ýaqytyly den qoıyldy.
Eldiń qoǵamdyq qaýipsizdigin qamtamasyz etýge «Búrkit» arnaıy maqsattaǵy bólimsheleri eleýli úles qosyp keledi. Olardy damytý jáne jaýyngerlik múmkindikterdi arttyrý boıynsha belsendi jumystar júrgizilip otyr.
О́zara is-qımyl jasaıtyn organdarmen birlesip aýqymdy arnaıy 12 operasııa júrgizildi. 10 qylmystyq top joıyldy, toptyń 17 kóshbasshysy men 124 belsendi qatysýshysy ustaldy.
«Qarasora» is-sharalaryn ótkizý sheńberinde esirtki qylmysyna qarsy is-qımyl jónindegi qyzmetkerlermen birge ósirilgen qarasoranyń 19 egis alqaby tabyldy, quramynda 15 myńnan astam ósimdik tektes esirtki bar butalar tárkilendi.
Jalpy, ótken jyly Ulttyq ulanǵa júktelgen qyzmettik-jaýyngerlik mindetter tolyq kólemde oryndaldy. 2023 jyly áskerlerde jedel-qyzmettik jáne jaýyngerlik daıarlyqty arttyrý jáne jetildirý jónindegi is-sharalar kesheni ótkizildi.
Keńeıtilgen otyrysta Bas áskerı prokýror ádilet general-maıory Dastan Sekenov sóz sóıledi. Dastan Ábdiqadyruly Ulttyq ulannyń memlekettik organdar júıesindegi quqyqtyq tártipti, qoǵam men memlekettiń qaýipsizdigin qamtamasyz etýde mańyzdy ról atqaratynyn atap ótti. Sondaı- aq, qurylymdar arasyndaǵy ártúrli alańdarda ózara is-qımyl jáne quqyqtyq yntymaqtastyq qamtamasyz etilgenin atap ótti. Buǵan Qaýipsizdik keńesi, Úılestirý keńesi, Birlesken alqa otyrystary men keńester janyndaǵy arnaıy komıssııa jatady.
Áskerı keńes otyrysyn qorytyndylaı kele, Ishki ister mınıstri áskerlerdiń jaýyngerlik daıyndyǵy men jaýyngerlik qabiletin arttyrýǵa, atys jabdyqtaryn satyp alý úshin qajetti qarajat bólý kerektigine erekshe nazar aýdardy.
«Áskerlerdi daıarlaý – bul jeke quram arasyndaǵy áskerı tártipke negizdelgen jaýyngerlik ázirliktiń bastaýy. Sondyqtan bólimshe komandırinen bastap ásker qolbasshysyna deıin áskerı qyzmetshilerdi tárbıeleýmen, moraldyq-psıhologııalyq jaı-kúıimen aınalysýy tıis», dedi polısııa general-leıtenanty Erjan Sádenov.
Sonymen qatar jıyn sońynda Ishki ister mınıstriniń orynbasary – Ulttyq ulannyń Bas qolbasshysy atynan jaýyngerlik jarystyń qorytyndysy boıynsha birinshi oryn alǵany úshin dıplomdarmen jáne aqshalaı syılyqtarmen óńirlik qolbasshylyqtar arasynda «Ortalyq» О́ńQ áskerı ujymy; jedel maqsattaǵy quramalar arasynda 5573 áskerı bóliminiń ujymy; QAJB kúzetý jáne aıdaýyldaý jónindegi áskerı bólimderdiń arasynda 3517 áskerı bólimniń jeke quramy; arnaıy motorlandyrylǵan áskerı bólimder arasynda 5513 jáne 6655 áskerı bólimderiniń jeke quramy; mańyzdy memlekettik obektilerdi kúzetý jónindegi arnaıy bólimderdiń arasynda 3650 áskerı bóliminiń jeke quramy; joǵary áskerı oqý ornynyń, avıasııalyq bólimniń, Ulttyq ulannyń qyzmetin qamtamasyz etetin áskerı bólimder arasynda Ulttyq ulan Akademııasynyń jeke quramy marapattaldy.
Al jedel maqsattaǵy áskerı bólimder arasynda birinshi oryn alǵany úshin Bas qolbasshynyń dıplomymen, aqshalaı syılyqpen jáne qoǵamdyq tártipti saqtaý jónindegi qyzmetti atqarýǵa arnalǵan arnaıy avtokólikpen Qaraǵandy qalasynyń 5451 áskerı bóliminiń jeke quramy marapattaldy. GAZ-27527 «Sobol» kóliginiń kilti áskerı bólimniń komandıri podpolkovnık Raýan Omarovqa tabystaldy.
Sóz sońynda mınıstr ofıserler men komandırlerge jaýyngerlik qyzmette tolaǵaı tabys tiledi.
