Qańtar aıynyń 25 juldyzynda, 17.00-de «Egemen Qazaqstan» gazeti redaksııasynda «Egemen jastar» atty ádebı kesh ótedi. Ádebı keshte óleńder men prozalyq shyǵarmalar oqylyp, belgili dástúrli ánshi Sáýlejan Taǵzııa jáne aıtýly kúıshi Qaırat Aıtbaev óner kórsetedi. Ádebı keshke jazýshylar Asqar Altaı, Qýanysh Jıenbaı, aqyndar Suraǵan Rahmetuly, Dáýletkereı Kápuly, Qalqaman Sarın, Tanakóz Tolqynqyzy qatysady.
«Keshegi Smaǵul Sádýaqasuly, Muhtar Áýezov, Júsipbek Aımaýytuly, Beıimbet Maılın, Sáken Seıfýllın, Sherhan Murtaza, Ábish Kekilbaev syndy qadaý-qadaý qalamgerler eńbek etken qara shańyraq – «Egemen Qazaqstan» gazeti redaksııasynda búgingi egemen jastardyń ádebı shyǵarmashylyq keshi ótýi úlken shyǵarmashylyq sabaqtastyq dep bilemin. Bul kesh burynǵy keshten ózgerek bolmaq. Ádebı keshte jańadan shyqqan «Juldyzymnyń joryǵy» atty poezııa kitabymnyń jáne jazýshy Abaı Aımaǵambettiń «Burylysqa jarty qadam qalǵanda» atty detektıv janryndaǵy jańa romanynyń tusaýy kesiledi. Sonymen birge gazetimizdiń jas órenderi Sándibek Asanáli, Eligimaı Tóńker, Abzal Maqash óleń oqyp, ónerlerin pash etedi. Keshke Astana qalasynda turatyn qalam ıeleri men ádebıetsúıer qaýym ókilderi qatysady», dedi aqyn Jánibek Álıman.
Aıta keteıik, kesh uıytqysy – aqyndar Jánibek Álıman men Batyrhan Sársenhan, jazýshylar – Baqytbek Qadyr men Abaı Aımaǵambet. «Egemen Qazaqstan» gazetinde eńbek etip júrgen talantty jastar ártúrli joǵary marapattardy ıelenip júr.
