Foto: qaz-media.kz
Telegram arnaǵa sanaýly saǵatta júzdegen jazylýshy tirkelip úlgergen. Bul jaıttan polısııa men oblystyq bilim bólimi habardar. Olar jedel sharalar qabyldanyp jatqanyn málimdedi.
«Qaýipsizdik organdary tolyq habardar, búginnen bastap 3 kún qatarynan bilim obektileriniń barlyǵynda kúsheıtilgen baqylaý uıymdastyrylady», dedi Aqtóbe oblystyq bilim basqarmasynyń basshysy Jaıyq Sultan.
Áleýmettik jelidegi arnany júrgizýshi birinshi nysanǵa qaladaǵy №21 jáne №27 mektepter alynǵanyn habarlap, fotosyn da jarııalady.
«Áleýmettik jelilerde belgisiz tulǵalar Aqtóbe mektepterinde qylmys jasaýǵa daıyndalyp jatqany týraly aqparat taralyp jatyr. Osy fakti boıynsha polısııa departamenti terrorızm aktisi týraly kórineý jalǵan habarlaǵany úshin sotqa deıingi tergep-tekserýdi bastady. Osy aqparatty taratqan tulǵalar anyqtalyp, eldiń zańnamasyna sáıkes jaýapkershilikke tartylady. Oqý oryndarynyń qaýipsizdigin qamtamasyz etý, onyń ishinde beınebaqylaý arqyly jáne olarǵa jaqyn jerlerde polısııa jasaqtaryn kóbeıtý arqyly kúsheıtýge erekshe nazar aýdaryldy. Azamattardan arandatýshylyqqa berilmeýdi suraımyz», dedi Aqtóbe qalalyq polısııa basqarmasynyń basshysy Áset Qalıev.
