Foto: polisia.kz
«Qaraǵandy oblysy, Saran qalalyq polısııa bóliminiń qyzmetkerlerimen júrgizilgen keshendi is-sharalar barysynda alaıaqtyqpen aınalysqan 19 jastaǵy Qaraǵandy qalasynyń turǵyny ustaldy.
Belgili bolǵandaı, 73 jastaǵy zeınetker áıelge belgisiz bireýler qońyraý soǵyp, nemeresi jol-kólik oqıǵasyn jasaǵanyn, ol jerde jaıaý júrginshi aýyr jaraqat alǵanyn aıtqan. Al jol-kólik oqıǵasyn jasaǵan kináli adam qylmystyq jaýapkershilikke tartylatynyn aıtyp, ony sheshý úshin 9 mıllıon aqsha suraǵan. Zeınetker, bul habarlasqan adamǵa qolynda bar 700 myń teńge jáne 5 myń AQSh dollaryn bergen. Keıin, óziniń alaıaqtyń qurbany bolǵanyn sezgen soń, polısııaǵa aryzdanǵan. Tártip saqshylary kúdiktiden zeınetker bergen aqshany ıaǵnı 550 myń teńge jáne 5 myń AQSh dollaryn aıǵaq zat retinde tárkiledi. 150 myń teńgemen kúdikti óziniń nesıesin jaýyp úlgergen», delingen aqparatta.
Tergeý kezinde kúdiktiń dál osyndaı taǵy 5 qylmysqa qatysy bary anyqtalyp, járilenýshilerge keltirgen shyǵyn mólsheri 6 mıllıon 600 myń teńge bolǵan. Qaraǵandy oblystyq polısııa departamenti bastyǵynyń orynbasary Ábil Ábildın kúdiktiniń ústinen alaıaqtyq babymen qylmystyq is qozǵalyp, tergeý júrip jatqanyn málim etti.
