Foto: Jaslan Jumabekov
«Prezıdent Qasym-Jomart Toqaev damyǵan memleketterge barǵan saparynda dúnıejúzine tanymal kásiporyn basshylaryn elimizge tize qosyp jumys isteýge shaqyrdy. Osyndaı qadamnyń nátıjesinde Qazaqstanda buryn-sońdy bolmaǵan, ozyq jabdyqtarmen jabdyqtalǵan shyny óndirisi iske qosyldy.
Biz qańtar aıyndaǵy saılaýshylarmen kezdesý barysynda Qyzylorda oblysynda bolyp, «Orda Glass LTD» kásipornyn da aralap kórdik, ujymymen júzdestik. Elimizdegi jalǵyz shyny zaýyty bul. Joba ınvestorlardyń jeke qarajaty esebinen 46 mıllıard teńgege salyndy. 373 adamdy jumyspen qamtyp otyr. Zaýyt iske qosylǵaly 173 myń tonna ónim shyǵarylyp, onyń 70%-y ishki naryqqa satylsa, 30%-y kórshi elderge eksporttalǵan. Biraq qazirgi tańda ishki naryqtyń suranysyna shetelden kelgen shyny ónimi kóbeıdi. Sebebi ózge elderdiń úkimeti otandyq taýar óndirýshilerine qoldaýdyń áralýan mehanızmin jasap otyr. Mysaly, qosymsha qun salyǵyn qaıtaryp, gaz baǵasyn tómengi tarıfpen berip jatyr. Osyndaı qoldaý-kómekten keıin de ımporttalatyn shyny baǵasy arzan. Joǵaryda atalǵan jobanyń elimiz úshin mańyzdylyǵyn eskerip, otandyq taýar óndirýshilerge qoldaý jasaý qajet», dedi M.Ergeshbaev.
Depýtat elimizge ımporttalatyn ónimdi tutynýdan góri, qurylys nysandaryna otandyq ónimderdi qoldanýdy talap etkende ǵana óndiris salasyn kórkeıtýge múmkindik bolatynyn aıtty.
