Foto: Vıdeoskrın
Vedomstvo basshysynyń málimdeýinshe, ónertapqyshtyń oılap tapqan QazaqGPT baǵdarlamasyn osy kúnge deıin 2000-nan astam adam qoldanyp úlgergen. Jas ǵalymnyń atalǵan jobasyna amerıkalyq ǵalymdar qyzyǵýshylyq bildirip, ony birlese jumys jasaýǵa shaqyryp otyr. Asyljan JI-di qazaq tiline qolaıly etý úshin, baǵdarlamaǵa 300 000 astam ana tilimizdegi sóz ben 227 mlrd-qa jýyq aqparat engizgen. Bul – irgeli de, iri jetistik. Mektepti endi támamdaǵaly otyrǵan jas ónertapqyshqa elimizdegi eń iri 3 JOO bilim grantyn usynǵan.
Asyljan Abdýllaevtyń maqsaty – qazaqsha JI jobasyn odan ári jetildirip, smartfon baǵdarlamasyna engizý ekendigin, vedomstvo jas talantty ǵalymdardy qashanda qoldaýǵa ázir ekendigin jetkizgen mınıstr: «Memleket basshysy «Úkimet jasandy ıntellektini damytý isine basa nazar aýdarýǵa tıis. Álemde aldaǵy birneshe jylda osy salaǵa bir trıllıon dollardan astam ınvestısııa salynady degen boljam bar. Jasandy ıntellekt ony damyta bilgen elderdiń ishki jalpy ónimine aıtarlyqtaı úles qosýy múmkin. Jasandy ıntellektiniń múmkindikterin tolyq paıdalansaq, bilim ekonomıkasyna tyń serpin beremiz. Jetekshi halyqaralyq kompanııalarmen yntymaqtastyq ornatý kerek. Bilikti mamandar daıarlaýymyz qajet. Keminde úsh belgili joǵary oqý orny jasandy ıntellekt salasyna qajetti kadr daıarlaýmen jáne zertteýler júrgizýmen aınalysýy kerek», degen edi. Memleket basshysynyń tapsyrmasy aıasynda osyndaı ıgilikti dúnıelerdiń ashylyp jatqandyǵy shyn máninde biz úshin zor jetistik hám úlken maqtanysh», dedi.
