Foto: gov.kz
Mınıstrdiń aıtýynsha, BUU reıtıngi boıynsha bizdiń el onlaın qyzmetterdi kórsetý boıynsha álemde 8-shi orynda tursa, jalpy elektrondy úkimetti damytý boıynsha 28-oryndy mise tutty. Kólikterdi úıde otyryp-aq 5 mınýttan az ýaqyt ishinde tirkeýden qolma-qol aqshasyz tólemderdi engizýge deıin sıfrlyq ınfraqurylymdy damytý sheńberinde tabysqa qol jetkizildi.
«Memlekettik qyzmetterdiń 93 paıyzǵa jýyǵy elektrondy túrde kórsetiledi, 50 mıllıon anyqtama tolyǵymen alynyp tastaldy, óıtkeni bizde ıntegrasııalanǵan aqparattyq júıeler bar jáne memlekettik organdar men uıymdardan anyqtama talap etýge tyıym salynǵan», dep atap ótti Baǵdat Mýsın.
Mınıstr 2024 jyldan bastap e-Gov baǵdarlamalaryna jasandy ıntellekt engizýge daıyndyq bastalǵanyn, jaqyn arada GPT chat formatyndaǵy baılanys arqyly memlekettik qyzmetterge de qol jetkizýge bolatynyn aıtty.
«Biz qazaq tilinde LLM qurý boıynsha jumys istep jatyrmyz», dedi ol.
Aıta keteıik, Almatyda Digital Almaty 2024 sıfrlyq forýmy ótip jatyr. Forýmda 200-den astam spıker sóz sóılep, ekonomıka men ınnovasııanyń naqty sektorynda jańa tehnologııalardy qoldanýdaǵy sátti istermen bólisedi. Úsh kúnge sozylatyn sıfrlyq is-sharaǵa 30 myńnan astam adam qatysady.
