Qańtardyń sońǵy kúni «Batys Qytaı – Batys Eýropa» avtojolynyń 567-shaqyrymynda bolǵan jol-kólik oqıǵasy jurtty alańdatyp qoıdy. Málimetke sensek, borandy kúni 26 kólik soqtyǵysqan. Onyń tórteýi jolaýshylar avtobýsy bolsa, qalǵany – júk kóligi jáne jeńil avtokólikter. Nurlykent aýylynyń mańynda bolǵan apat saldarynan 31 qańtar kúni 26 adam Jýaly aýdandyq ortalyq aýrýhanasyna jetkizilgen. Olardyń arasynda náreste de bar.
Mamandardyń aıtýynsha, túrli dárejede jaraqat alǵandardyń ishinde tórt azamattyń jaǵdaıy aýyr. Olar mamandardyń jedel iske kirisýimen jansaqtaý bólimine jatqyzylǵan. Al bir azamat sanavıasııa arqyly oblys ortalyǵyna jetkizilgen.
«Balanyń jaǵdaıy ortasha, al tórt adam jansaqtaý bólimine ornalastyryldy. On bes azamat aıaq-qoly, keýdesinen jaraqat alǵan. Olardyń da jaǵdaıy ortasha. Jol-kólik oqıǵasy saldarynan jaraqat alǵan azamattarǵa tıisti medısınalyq kómek der kezinde kórsetildi», deıdi oblystyq Densaýlyq saqtaý basqarmasynyń baspasóz hatshysy Tolqyn О́mirbaeva.
Bet qaratpaıtyn boran kezinde apatqa ushyraǵan avtobýsta elýge jýyq jolaýshy bolǵan. Olar jergilikti atqarýshy bıliktiń jaýapty mamandardy shuǵyl jumyldyrýynyń arqasynda jaqyn mańdaǵy jylytý pýnktine ornalastyrylǵan.
Al oblystyq Tótenshe jaǵdaılar departamenti basshysynyń orynbasary Rýslan Orynbekovtiń aıtýynsha, TJD azamattyq qorǵaý qyzmetin jedel jumyldyrǵan. Aýa raıynyń aldaǵy kúnderi myń qubylýy múmkin ekenin eske salǵan ol azamattardyń alys jolǵa shyqpaǵanyn maqul kórip otyr.
«Balalarymyzben kele jatqan edik. Myna jol apaty esimizdi shyǵardy. Kelinimiz basyn uryp aldy, qalǵanymyz ne bolǵanyn túsinbeı daǵdaryp qaldyq. «Jol azabyn júrgen biler» degen osy shyǵar. Bastysy, dittegen jerimizge din aman jetsek bolǵany. Bul da bir bizge berilgen synaq shyǵar», deıdi shymkenttik azamatsha Aınur Ospanova.
Oblystyq polısııa departamentiniń qyzmetkerleri jol qozǵalysy erejelerin saqtaý, qolaısyz aýa raıynda jolǵa shyqpaý týraly birneshe márte eskertý joldaǵandaryna qaramastan, júrgizýshiler erejeni buzýdy toqtatar emes. Jyldamdyqty asyryp, qashyqtyqty saqtamaıtyn, jazǵy dońǵalaqtarmen júretin avtokólik ıeleri áli kúnge deıin azaıar emes.
Nurlykent aýylyndaǵy jol-kólik oqıǵasyna kim kináli? Bul máseleni tıisti organdar zerdeleıtini anyq. Aldaǵy kúnderi qorytyndysy belgili bolady. Jol-kólik oqıǵasyna aıypty birneshe adam bolýy da múmkin. О́ıtkeni bir emes, 26 avtokólik apatqa ushyrap otyr. Qalaı bolǵan kúnde de máseleniń mán-jaıyn quqyq qorǵaý organdary anyqtaıdy.
Qystyń kózi qyraýda avtokólik júrgizýshileri saýysqandaı saq bolǵany jón. Jurt arasynda «Borandy beket» atanyp ketken Jýaly aýdanynyń aýmaǵymen júrmes buryn avtokólik ıeleri joldyń jaǵdaıy men aýa raıy týraly málimetti bilip otyrsa quba-qup. Eń durysy, qarapaıym habarlamaǵa qulaq asqan jón.
Jambyl oblysy,
Jýaly aýdany
