«Baıqaý onlaın ótedi. Oqylatyn kitaptar da, qazylar alqasynyń quramy da anyqtaldy. Kitaptardyń tizimi saıtta jarııalanady. Oqyrmandar sol saıtqa tirkelgen soń, usynylǵan kitapty berilgen ýaqyt ishinde oqyp shyǵady. Odan keıin onlaın test tapsyrady. Al osy úsh kezeńnen ótip, iriktelip shyqqandar fınaldyq kezeńde esse jazady. Qorytyndy kezeń oflaın rejimde ótedi. Osylaısha, kitap oqıtyn ortany qalyptastyryp, kópshiliktiń kórkem ádebıetke degen qyzyǵýshylyǵyn arttyra túspek nıet bar», deıdi oblystyq kitaphana basshysy Darıǵa Dúısebaeva.
«Oqy jáne jeń» onlaın baıqaýyn uıymdastyrýshylar oqýǵa usynylǵan kitaptardy oqyrmandardyń jas ereksheligin eskere otyryp tańdaǵany kórinip tur. Mysaly, birinshi kezeńde 10 jastan 14 jasqa deıingi balalarǵa Berdibek Soqpaqbaevtyń «Balalyq shaqqa saıahat» povesi, 15-ten 18 jasqa deıingi jasóspirim oqyrmanǵa Baqqoja Muqaıdyń «О́mirzaıasy», al 19-ǵa tolǵan jáne odan joǵary jastaǵy eresek oqyrmandarǵa Smaǵul Elýbaıdyń áıgili «Aqboz úı» tragedııasy usynylyp otyr.
«Osy baıqaýǵa daıyndyq barysynda oblys ákiminiń orynbasary Rınat Zákıuly bárimizdi kitaphanaǵa birneshe ret jınap, oqyrmanǵa qandaı kitap usynamyz degen máseleni ábden pisirip, pysyqtap aldyq. Oqyrmannyń jas ereksheligin, kitaptardyń elektrondyq nusqasynyń bolýyn eskerdik. Ár kitaptyń ózindik júgi, aıtar oıy bar. Taıaýda ǵana baıqaýdyń saıty ashyldy. Oǵan qazirdiń ózinde 500-den astam adam tirkelgen. Osyǵan qaraǵanda, atalǵan joba ulttyq ádebıetimizdi nasıhattap, oqyrmandarymyzdy oıatatyn sátti joba bolatyn sııaqty», deıdi qazylar alqasynyń múshesi Shynar Tólegenova.
Baıqaýdyń júlde qory da qomaqty. Jeńimpazdarǵa 150 myń teńgeden aqshalaı syılyq beriledi. Júldegerlerge 100 myń, 50 myń teńgeniń syılyǵy daıyn tur. Munyń syrtynda, kámeletke tolmaǵan 4 ozyq oqyrman elimizdegi eń úzdik balalar lagerine joldama alady. Al eresekter úshin Meńdiqaradaǵy M.Qarabaev atyndaǵy shıpajaıǵa 2 joldama qarastyrylǵan.
Qostanaı oblysy
