Foto: Gov.kz
«Osy mindetti iske asyrý úshin Kólik mınıstrligi quryldy. Sondyqtan, mınıstrlik osy saladaǵy ózekti máseleler boıynsha shuǵyl jáne tıimdi sheshimder qabyldaýy kerek. Naqty nátıje kútemin.
Bıyl birinshi jartyjyldyqta temirjol salasyndaǵy ózekti máselelerdi sheshý joldaryn qamtıtyn Baǵdarlamalyq qujatty qabyldaý qajet. Másele az emes. Atap aıtqanda, vagondardy jańartý jumysyn tezdetý kerek. Konteınerlerdiń tapshylyǵyn joıý qajet. Magıstraldy jelilerdi keńeıtýge qatysty barlyq jobalardy júzege asyrý qajet (2028 jylǵa qaraı 1,3 myń shaqyrym). Jalpy, temirjol salasyn qarqyndy túrde sıfrlandyrý kerek. Bul qadam onyń tıimdiligi men ónimdiligin edáýir arttyrýǵa, bıýdjet qarajatyn únemdeýge múmkindik beredi», dedi Memleket basshysy.
Prezıdent elimizdegi ekonomıkalyq ósimdi qamtý isinde avtojoldardyń mańyzdy nysan ekenin aıtty. Sonymen birge Q.Toqaev el boıynsha jóndeý jumystary sozylyp ketken avtojoldardy atap, isti bıyl aıaqtaýdy talap etti.
«Elimiz úshin aıryqsha mańyzdy «Astana-Balqash-Almaty» tas joly áli kúnge deıin jóndelip bitken joq. Qurylys 2017 jyldan beri júrip jatyr. Respýblıkalyq mańyzy bar «Atyraý-Astrahan», «Aqtóbe-Qandyaǵash», «Taldyqorǵan-О́skemen» joldarynyń jóndelip jatqanyna 5 jyldan asty. Bıyl osy jumystar birjola aıaqtalýǵa tıis. Bul jerde birneshe máseleni eskerý qajet. Qalyptasqan tájirıbege qarasaq, respýblıkalyq mańyzy bar joldardyń tenderin kóp jaǵdaıda tek shetel kompanııalary utyp alady. Mundaı jobalarǵa qolynan is keletin, tıisti tehnıkamen jabdyqtalǵan óz kásiporyndarymyzdy tartý kerek. Sonymen qatar jol qurylysyna qajetti tehnıkany elimizde shyǵarý tetikterin damytyp, ózimizdiń daıyn ónimdi paıdalaný kerek», dedi Memleket basshysy.
Qasym-Jomart Kemeluly jol salý máselesinde onyń qaı aýmaqta salynyp jatqanyna qaramastan sapaly bolyp shyǵýyn basty orynǵa qoıýdy tapsyrdy.
