Foto: egemen.kz
Kompanııa Qazaqstanda suranys kóp baǵyttar qatarynda «Almaty-Astana», «Astana-Pavlodar», «Astana-Qaraǵandy» jáne «Astana-Qostanaı» poıyzdaryn atady.
QTJ poıyzǵa bıletti tez, artyq shyǵynsyz alýdyń 3 qadamyn aıtty:
1.Bıletterdi aldyn-ala satyp alý
Poıyz bıletteri resmı 45 kún buryn satylymǵa shyǵady. Jol júrý qaǵazyn bilet.railways.kz saıtynan tikeleı nemese vokzalda ornalasqan kassalardan satyp alýǵa bolady. Sapar erterek belgili bolsa bıletti aldyn-ala alsańyz aqshańyzdy únemdeısiz ári jol júrý ýaqyty taıaǵan saıyn bılet azaıatynyn, taýsylatynyn eskergen jón. Bılet alýǵa erte qam jasaý arqyly barar jerińizge qalaǵan, qolaıly orynda jetip alýǵa múmkindik beredi.
2. Bıletti onlaın satyp alý.
Tehnologııa damyǵan búgingi kezeńde bıletterdi kompanııanyń resmı saıtymen qatar, túrli platformada ońaı, jyldam alýǵa bolady. Bul áreket vokzalǵa baryp-kelý ýaqytyńyzdy únemdep qana qoımaı, jol shyǵynyńyzdy da qysqartady. Qosymsha komıssııalyq shegerimder de ustalmaıdy.
3. Jańa bıletterdiń satylymǵa shyǵý merzimin qadaǵalaý.
Elde, ásirese, mereke qarsańynda bıletter jyldam satylyp ketedi. Alaıda bul endi bıletsiz qalýdy ańǵartpaıdy.
«Bıletter sany shekteýli negizde satylymǵa shyǵady. Sondyqtan únemi bilet.railways.kz saıtyn qadaǵalap otyrý kerek. Sebebi keı jolaýshy bıletin qaıtaryp jatady. Sonymen qosa bıletti «kútý paraǵy» arqyly satyp alý múmkindigi bar. Bul qyzmet arqyly jol júrý bıletterin taba almaǵan jaǵdaıda, kútý paraǵyna tirkelip, bıletti 7 kún buryn jáne poıyz jóneltilgenge deıin eki saǵattan keshiktirmeı satyp alýǵa múmkindik beriledi. Sondaı-aq «kútý paraǵyna» saıtta da tirkele alasyz. Oryn paıda bolǵan jaǵdaıda jolaýshynyń saıttaǵy jeke kabınetine jáne telefon nomerine bosaǵan bıletti satyp alý jóninde SMS-habarlama keledi», dep túsindirdi «QTJ» ulttyq kompanııasynyń baspasóz qyzmeti.
Budan bólek bılet múldem tabylmaǵan jaǵdaıda keıbir mekeme belgili bir kúnge habarlandyrý jiberý qyzmetin usynady. Qyzmetke qosylǵan kezde telefonyńyzǵa bıletter qaıta satyla bastaǵany týraly SMS-habarlama keledi.
Aqparatty naqtylańyz
Jolaýshylar týyndaǵan saýaly men shuǵyl aqparatty 1433 nómiri men KTZH_PP_BOT Telegram-boty jáne @jolaushylar_tasymaly resmı Instagram akkaýnty arqyly tegin surap, bile alady.
