Kórmege tarıhı eskertkishtegi kýfı jazýymen jazylǵan 50-den asa jazý úlgisi jáne XIII ǵasyrda jazylǵan tarıhı tulǵalardyń ómir derekteri men XVIII ǵasyrda Ortalyq Azııadaǵy túrki halyqtarynyń kóshbasshylary týraly qaǵazǵa túsken «Zobdat-ýl-tarıh» qoljazbasynyń kóshirmesi qoıyldy.
Mazmundy sharanyń ashylýynda Qoljazbalar jáne sırek kitaptar ulttyq ortalyǵynyń dırektory Jandos Boldyqov elimizde alǵash ret ótip otyrǵan kórmeniń mańyzyna toqtaldy.
«Bizdiń ortalyq pen Iran Islam Respýblıkasynyń elimizdegi elshiligi birlesip uıymdastyrǵan is-shara bir aptaǵa josparlanǵan. Sonyń alǵashqysy «Kallıgrafııa» kórmesimen ashyldy. Munda kóptegen qundy tarıhı derek usynylǵan. Mádenı is-shara aıasynda eki eldiń osy saladaǵy mamandary kezdesip, bir-birimen tájirıbe almasady», dedi Jandos Bekdildáuly.
Iran Islam Respýblıkasynyń Qazaqstandaǵy Tótenshe jáne ókiletti elshisi Alı Akbar Djoýkar óz sózinde jazba muralardy saqtap, qorǵaý isi ulttyń tarıhyna degen úlken jaýapkershilik ekenin jetkizdi.
«Iran mamandary qoljazbalar men baspa isin restavrasııa jasaýda ozyq tájirıbege baı. Búgingi kórmege tarıhı-mádenı eskertkishterden alynǵan kóne jazýlar úlgisi men qoljazba kóshirmeleri jáne restavratorlardyń joıyla bastaǵan muralardy qaıta jańǵyrtqan tańdaýly jumystary qoıylǵan», dedi elshi myrza.
Aıta keteıik, aptalyq aıasynda «Iran Islam Respýblıkasynyń kallıgrafııa jáne jazba muralardy qalpyna keltirý óneri» atty ǵylymı-tájirıbelik semınar uıymdastyrylyp, sheberlik sabaǵy ótedi. Sondaı-aq Irannan kelgen mamandar men otandyq restavratorlar kóne qoljazbalar men sırek kitaptardy katalogteý, júıeleý, sıfrlyq júıege kóshirý, qalpyna keltirý jáne kallıgrafııa óneri boıynsha tájirıbe almasady.
