2022 jyldyń qarasha aıynda bastaý alǵan «Bir aýyl – bir ónim» jobasy sheńberinde 33 adam jumyspen qamtyldy. Olardyń qatarynda zeınetkerler de, múmkindigi shekteýli jandar da, jastar da bar. Joba nátıjesinde bir jyldyń ishinde AQSh, Germanııa, Túrkııa, Qytaı jáne Reseı syndy bes memleketke óz ónimderin joldap úlgergen. Qazaqstannyń da túkpir-túkpirinen tapsyrys kelip túsedi. Aıta keteıik, «Bir aýyl – bir ónim» – elimiz boıynsha túıe, qoı júninen kóptoptamaly oıynshyqtar men kádesyılar shyǵaratyn jalǵyz joba.
– Tyń ıdeıany negizi mentorymyz Sáýle Halelqyzy japondyqtardan kórip, óz elimizde iske asyrýǵa bel býdy. О́ıtkeni Mańǵystaýda qoı men túıe júni kóbine paıdaǵa aspaı, dalada órtenip jatady. Qoldaǵy shıkizatty kádege jaratyp, bir jaǵynan aýyldaǵy qyz-kelinshekterge úıretip, tabys tabýyna septesýge maqsat qoıdyq. Sol maqsat búginde iske asyrylyp jatyr, dedi joba jetekshisi Jańagúl Japarova.
Joba jetekshisi jergilikti sharýa qojalyqtarynan túıe júniniń 1 kılosyn 500 teńgege, qoı júnin tegin alatyndyǵyn aıtty. Búginde joba aıasynda ónim kólemin ulǵaıtyp, ózge elderge eksporttaý jospary bar.
Bul joba qyz-kelinshekterdiń qyzyǵýshylyǵyn týǵyzǵan, olar jobaǵa atsalysyp qosymsha tabys tabýdy jón sanaıdy.
– Mektepte – muǵalimmin, al bul jerde bilgenimdi qyzdarǵa úıretemin. О́nim tolyq daıyn bolǵannan keıin, ózim tekserip, olqy ketken tustaryn óńdeımin. Júnnen jasalǵan kez kelgen buıymdy, aıaqkıim, syrt kıim bolsyn óz tájirıbeme súıenip óńdep, ózgertip, jaramdy dúnıe shyǵara alamyn. Jalpy, mundaı ispen aınalysyp kele jatqanyma on jyldyń shamasy boldy, – dedi «Bir aýyl – bir ónim» jobasynda tehnolog qyzmetin atqaryp júrgen muǵalim Anar Qoshaeva.
Mal júnin qajetke jaratyp, elge paıdaly buıymdar usyna bilgen qyz-kelinshekter isi kópke úlgi bolýǵa laıyqty.
Mańǵystaý oblysy
